Oeuvres complètes. Tome II. Correspondance 1657-1659

[p. 419]

N^o 627.
P. Petit à Christiaan Huygens.
13 juin 1659.

La lettre se trouve à Leiden, coll. Huygens.

A Paris le 13 Juin 1659.

Monsieur &c.

Quelques voyages que jay fait a la Campagne ayant jnterrompu le Cours de Mes ouurages & lhonneur que jauois de vous en entretenir¹⁾ Je Reprens Maintenant la mesme liberté & vous vays Rendre Compte de leurs succes qui ne mont point encores satisfait.

Je pense vous auoir mandé²⁾ comme ayant voulu appliquer vn Pendule a vne montre de mesme grandeur que celle que vous auez pris la peyne de me faire faire & qui deuoit auoir le pendule de mesme longeur ayant mesme nombre de battemens & y ayant appliqué le pignon O³⁾ & la Roue P portant la maniuelle jl y auoit fallu tant de poids pour le faire marcher que j'en anois esté desgoute. Mais despuis que Jeus Receu le vostre⁴⁾ dont je ne scay si je vous ay remercye assez amplement⁵⁾ a quoy Je supplee par Cellecy & vous en rends mes treshumbles graces, & que Jeus veu lé pendule suspendu au Centre de la maniuelle & les dentures des Roues O et P differentes de celles que jauois fait faire Je creus quen jmitant celuy que je venois de receuoir & copiant toutes choses jl jroit aussi de mesme. Neantmoins apres que tout fut fait & refait Je nen sceus encores venir about dont ayant recherché la Cause & layant mesme donné a racommoder au Compagnon Hanet⁶⁾ qui a demeure chez le Sieur Coster⁷⁾ & layant prie dy faire son possible apres lauoir gardé quelque temps sans le pouuoir faire marcher quauec des poids excessifs & beaucoup plus grands que celuy de Hollande, sa Pensee est que cest a cause quil y a 4 roues a Mon Mouuement, au lieu que le vostre nen a que 3, Mais comme tous mes pignons sont de 8, & que mes Palettes vont mesme train que les vostres, jl me sembloit que mon pendule deuoit aller aussi auec la mesme facilité sans estre retardé par le nombre des roues, Neantmoins ne voyant point d'autre cause apparente que celle du premier

1) Dans nos collections la dernière lettre de P. Petit, avant celle-ci, est la Lettre N^o. 586 du 7 février 1659.

2) Voir la Lettre N^o. 586.

3) Consultez la figure reproduite vis-à-vis de la page 254 de ce Tome.

4) C'est-à-dire l'horloge dont il est question dans les Lettres N^os. 598 et 601, et que Petit doit avoir reçue dans les premiers jours d'avril, alors que Boulliau recevait la sienne, qui était partie par la même occasion. (Voir la Lettre N^o. 605).

5) Nous ne possédons aucune lettre contenant les remercîments de Petit.

6) Voir la Lettre N^o. 550, note 7.

7) Salomon Coster. Voir la Lettre N^o. 452.

[p. 420]

Mobile, plus esloigné du pendule par 4 roues que par 3 encores quil face mesmes vibrations, Je croy que cest la veritable sur quoy Je vous supplye Monsieur de me Mander vostre sentiment & si vous estimez que cest a cause dvne 4^e Roue qu'il fault plus de poids pour faire marcher le pendule.

Au Reste celuy du Sieur Coster dont jl ma fait payer vne pistole de plus qu'a Monsieur Bouillaud quoy quen effect jl n'y aye pas plus douurage ne va pas mieux que le sien, au contraire jl sest arresté vne foys ou deux despuis que je men sers quoy que Jaye presque rousjours esté a la Campagne.

Pour Mon grand horloge du pendule a 3 pieds de longeur Marquant les demy secondes je vous en ay aussi Mande⁸⁾ les manquements vous ayant supplye de me faire scauoir le secret du vostre & les nombres & grandeurs de toutes vos Roues a quoy de vostre grace mayant Respondu vous mauez bien enuoye les nombres des dentures mais non pas les grandeurs des diametres et comme jl nestoit pas encores acheué vous ne mauez point escrit les autres circonstances. Cest pourquoy Maintenant que je vous en croys en lentiere Possession & que vous en auez lexperience & la jouissance vous Mobligerez jnfiniment de m'enuoyer au juste la grandeur de toutes les Roues leur denture la longeur de la Maniuelle, le Centre, la longeur exacte & la pesanteur du pendule, celle du poids & Contrepoids bref toute la description du vostre fort amplement & par le menu, affin que reformant le mien sur ce Modelle Je puisse en venir about & satisfaire tout le Monde qui m'en demande des nouuelles & qui en attend vn bon succes auant que de faire trauailler aux leurs comme chacun le desire & comme ilz y apprehendent les mesmes difficultez, dont Je ne puis deuiner la Cause sans vostre ayde que Jjmplore au plustot par vne exacte Response & description du vostre.

Quant a vostre Maniere dobseruer les Refractions par vn Cilindre⁹⁾ Je nen ay sceu venir about auec satisfaction quoy que Jen aye fait faire vn de Cristal & vn de verre de la grandeur du vostre, nayant pu voir dans le cilindre lextremite de la couleur rouge. Cest ascauoir du costé ou elle se va perdre entierement & non pas ou elle est changee en Jaune & Verd, Ce sont vos mesmes termes, mais seulement vne



clarté AB dans lombre ABCD de laquelle clarte je ne scay si vous entendez parler, & si cest delle dont jl faut prendre langle en Rasant le Costé du Cilindre ce que je nentends pas, mais tousjours je puis dire que ny moy ny de nos amys a qui je lay communique nauons pu voir cette couleur rouge ny le jaune & verd dont vous parlez.

Jattends donc aussi l'esclaircissement entiere sur cet arricle auant que de vous enuoyer la representation de ma machine tres simple pour obseruer en vn mesme temps & dans lespace dvne demy minute les refractions de tous les angles d'jnci-

8) Dans les Lettres N^os. 570, 571.

9) Voir la Lettre N^o. 573.

[p. 421]

dence, n'entendant pas aussi ce que vous voulez dire par langle de 22 degrez dans le verre, 18.22′ dans le Cristal & 41.30′ dans leau¹⁰⁾.

Pour les lunettes de longue veüe Monsieur Bouillaud na pas encores fait monter les siennes non plus que Moy les miennes de 30. & 40. pieds faute de tuyaux lesquels on ma rendu despuis peu de jours & jespere en voir auissi leffect dans peu & vous en mander le succes. Japprehende le Maniuelle de cette grande Machine & quoy que les tuyaux soient de boys aussi mince que les ordinaires jlz ne laissent pas de peser si fort que Je pense en effect quon les pouuoit faire aussi commodement de ferblanc en soudant 3 ou 4 bout a bout lun de lautre a cause de la Petitesse du ferblanc & pour diminuer la Pesanteur de ce qui entre les vns dans les autres. Monsieur Bouillaud les fera faire de mesme. Je me suis jmagine vne Maniere de determiner la Multiplication des objects qui est par celle de langle que chaque lunette (ayant mesme ouuerture) peut faire voir, comme par exemple si vne lunette ouuerte d'vn pouce n'embrasse qu'un angle d'vn degre & vne autre de mesme ouuerture en embrasse vn de 2, celle la grossira le double de celle cy. de mesme des autres &c. Pour cet effect comme de Mon logis Je vois le Mont Valerien a deux lieues dicy et toutes les maisons qui sont dessus en vne fort belle face & reguliere, Je veux aller prendre exactement leur plan & distance de mondit logis, affin de determiner par la base & les costez la precision des angles et conclure quels seront ceux de toutes mes lunettes. Pour le Miroir jl est fait de metal & tres bien mais Je ne lay pas encores applique a aucune lunette, Je nay besoin que de temps pour acheuer toutes ces Curiosites, que je souhaitte ardemment sans en pouuoir venir a la Conclusion.

Jay fait chercher mon liure des poids & Mesures¹¹⁾ & par la premiere Commodite que Je pourray trouuer autre que la poste quil ne faut point charger de gros paquets Je vous l'envoyeray & je pense que ce sera par celle de Monsieur le resident de Glargues¹²⁾ qui est a Calais. Cepandant Je vous prie de me continuer lhonneur de vos bonnes graces & de me croire veritablement

Monsieur

Vostre treshumble et tresobeissant seruiteur P. Petit.

A Monsieur Monsieur Hugens de Zulichem A la Haye en Hollande.

10) Consultez, pour la signification de ces angles, la Lettre N^o. 153.

11) Voir l'ouvrage cité dans la Lettre N^o. 537, note 4.

12) M. de Glargues, consul des Provinces Unies à Calais.