Oeuvres complètes. Tome II. Correspondance 1657-1659

N^o 570.
P. Petit à Christiaan Huygens.
17 janvier 1659.

La lettre se trouve à Leiden, coll. Huygens.
Chr. Huygens y répondit par le No. 573.

A Paris le 17 Januier 1659.

Monsieur,

Jattendois a Me donner lhonneur de vous escrire jusques a ce que Jeusse veu l'experience dun horloge a Pendule que jay fait faire sur vn qui ne lestoit pas. ou jusques a ce que Jeusse receu Nouuelles de celuy que vous mauez mande qui deuoit partir pour Moy vers la fin du Moys passé. Mais comme je suis dans ljmpatience de vous entretenir de ce qui m'est arriué Je ne puis differer dauantage. Vous scaurez donc qu'ayant chez Moy vn horloge a contrepoids marquant minutes & secondes Jours du Moys, de la lune & de la semaine des mieux faits & des plus justes comme ayant aussi tous les Pignons de 8 & a lanternes. Jay creu le rendre encores meilleur y adjoustant le Pendule qui doit estre justement de nos 3 pieds de Roy puisque chasque Coup de Palette marque vne seconde. Jay donc fait oster son balancier qui se desmontoit de dessus ses palettes, & en sa Place jy ay fait mettre vn pignon a lanterne de 24 dents autour [?], quoy quil ny en aye que la moitie de denté. Ce pignon mene

[p. 322]

vne Roue qui luy est double en diametre dont la moitie est aussi diuisee en 24 dents a larbre de laquelle est attachee la maniuelle QR de 4 pouces de longeur. Cela fait Jay mis mon pendule de 3 pieds auec son plomb denuiron 2 onces et lay suspendu enuiron 1 pouce tout au plus au dessus de la maniuelle Q. affin quil fit les vibrations mediocres. Cela fait Jay este bien estonne que au lieu de 3 ℔ de poids quil falloit a ma montre auant le pendule & ce qui laccompagne, jl men a fallu 30. Ce qui ma si fort estonné que pour en auoir recherche la cause en tous les endroits Je nen ay point trouué dautre que la difficulté plus grande de Mener tout cet attirail que de ne faire que pirouetter vn cercle ou balancier horizontalement. Jl est vray que jobmets a dire quayant fait faire vne 2^e poulie comme la vostre Ω¹⁾ jl y doit auoir la Moitie du poids dauantage que sil ny en auoit quune comme en mon horloge auant le Pendule. Mais tousjours cest 15 ℔ au lieu de 5, encores ne scay je si ces 30 ℔ suffiront pour le faire aller juste, car jay expres accourcy le pendule de 2 ou 3 pouces pour l'experimenter, Et comme tout ce que dessus ne fut fait qu'hyer au soir Je vous supplye Monsieur de Men mander vostre aduis & le remede sil y en²⁾ estant vne chose bien fascheuse dauoir pour vn petit horloge 30 ℔ de poids, Jespere pourtant en retrancher encores 10 ℔ en faisant les poulies Ω F des chordes plus grandes que les miennes ne sont, puisque jay de la place pour cela. Mais si vous y scauez quelque autre remede, ou si cela est necessaire a tous les mouuemens a pendules vous Mobligerez de me lescrire au premier Voyage affin que je le pratique & que je ne sois pas contraint de remettre mon mouuement a sa premiere forme.

Cepandant Jespere que je receuray celuy que vous auez eu la bonte de me faire faire sur lequel je pourray raisonner plus certainement. Jaurois bien souhaitte quil eut este distingué des autres & directement adressé a Moy par la voye de Monsieur Bouillaut ou de Monsieur vostre Ambassadeur³⁾ que jay lhonneur de connoistre, tant pour euiter les monopoles des douannes que pour estre asseuré quil naura point esté changé me deffiant que sil est mieux fait que lordinaire on ne me le change. Mais je me persuade Monsieur que vous y aurez apporté les precautions necessaires & quil tombera directement entre Mes mains auec la lettre dordre pour le Payement.

Quant a celuy de Strasbourg Je vous en ay enuoye la description le 27 du passe⁴⁾ Je croyois en receuoir vn de ces lieux la. Mais Monsieur Digby Mayant escrit de francfort que je ne le scauray [?] auoir de 5 ou 6 Moys au quel temps jl ne seroit plus en Allemagne pour me rendre cet office, Je luy ay mandé quil nen commenda pas, joint que Je les croye aussi sujet a manquer que tous les ordinaires. le dìt Monsieur Digby mayant aussi mandé que je scaurois des Nouuelles a amsterdam de quelques liures en feuilles deslobes, que je luy auois mandé de me chercher a Stras-

1) Consultez la figure reproduite vis-à-vis de la page 254.

2) Ajoutez: a.

3) W. Borcel. Voir la Lettre N^o. 63, note 6.

4) Voir la Lettre N^o. 558.

[p. 323]

bourg ou ils ont este imprimez jl y a 25 ou 30 ans. Jen escriuis jl y a huit jours a Monsieur Blaeu & le priay aussi de me rendre response sur dautres sujets, de quoy je vous supplye Monsieur de le faire ressouuenir & den communiquer auec luy si vous le voyez dans la dite ville, scachant quil est assez negligent de faire des responses a tout ce quon luy escrit. la derniere foys⁵⁾ que jeus lhonneur de vous escrire Joubliay a vous mander sur le sujet des Refractions que nentendant pas bien vostre Methode de les obseruer auec des Cilindres je Mjmagine des difficultez jnsurmontables & ne peux comprendre comment les exposant au soleil vous trouuez soubs quel angle y paroist la Couleur Rouge, parce que les Cilindres nestant pas fort grands jl me semble jmpossible de determiner exactement la grandeur de ces Angles, non plus que la couleur rouge contigue a vne autre ny les Consequences que vous en pouuez tirer. Vous Mobligerez donc jnfiniment si cela ne vous est point a charge de m'en escrire au plustot vostre doctrine & vos pensees affin que je vous descouure aussi librement les miennes & la table de mes refractions en attendant le loisir de les donner au public.

Pour les lunettes qui redressent auec vn Miroir, sur le Manquement de Memoyre de Monsieur Bouillaut, Je vous ay supplyé de m'en enuoyer la description comme je fais encores par la Presente Monsieur, en cas que vous eussiez oublyé de le faire. Jay les jours passez obserué le Croissant de Venus auec bonne Compagnie & de fort bonnes lunettes de 7 pieds de long en mon logis. Mais nous n'auons sceu voir les Montagnes ny Inegalitez dans son globe comme Fontana dit les auoir veues. Je vous supplye de me mander si vous les auez jamais veues & si vos lunettes sont assez bonnes pour cela. Je nay point encores pû essayer les Miennes de 25 & 40 pieds faute de tuyaux, ny nos ouuriers n'en ont sceu faire faute de boys mince pour cela quils attendent de jour a autre dauuergne dont jl vient, Je suis bien fasche de laisser passer cette occasion sans voir leurs effets sur ce planette. Si vous descouurez quelques nouueautez je vous seray extremement obligé dy auoir part & en toutes occasions Je tascheray de Men revencher en qualite de

Monsieur

Vostre treshumble & tresobeissant seruiteur P. Petit.

A Monsieur Monsieur Christian Hugens a Zulichen. A la Haye en hollande.

12.

5) Voir la Lettre N^o. 558.