Oeuvres complètes. Tome II. Correspondance 1657-1659

N^o 550.
P. Petit à Christiaan Huygens.
29 novembre 1658.

La lettre se trouve à Leiden, coll. Huygens.
Elle est la réponse au No. 546.

A Paris le 29 Nouembre 1658.

Monsieur

Je Vous rends Mille graces de lhonneur de vostre Response & des jmprimez que vous mauez enuoye de vostre horloge¹⁾ & lune de Saturne²⁾. Je me serois plustot acquitté de ce deuoir de Remerciement, si lesperance de vous mander le succes de mes grands Verres ne l'eut retarde. Mais comme le mauuais temps ne nous a pas laissé lhorizon clair & net, Je nen ay pu faire encores aucun essay a mon grand Regret. Sils faisoient ce que vous me marquez par la vostre cest a dire quilz pussent porter nettement ou sajuster auec vn conuexe oculaire dont le foyer fut moindre que la 100^me partie de lobjectif Je croirois auoir vn verre plus rare qu'un diamant de sa pesanteur. depuis plus de 30 ans en ca Je pense auoir manié les meilleures lunettes qui soient venues en france & crois en auoir fait faire auec toute lexactitude

1) Ouvrage cité dans la Lettre N^o. 511, note 2.

2) Ouvrage cité dans la Lettre N^o. 267, note 1.

[p. 279]

jmaginable plus de mille de toutes longeurs despuis 6 pouces jusques a 6 pieds mais je nen ay encores jamais pu trouuer de cette bonté & je vous estime bien heureux Monsieur si vous en auez de la sorte & principalement qui tirent 12 pieds parce que cest toute la perfection des lunettes de porter vn concaue ou conuexe le plus petit que faire se peut. Ce que je determine pourtant a vn pouce de diametre de sphere dans les plus excellentes lunettes jusques a 6 pieds, & jen ay vne de 3 qui auec vn semblable concaue, & conuexe oculaire moindre, fait plus que de grandes de 6 pieds venues d'jtalie auec leurs caues & conuexes de plus grand foyer. Ainsi Monsieur je n'espere pas tant du bonheur (qui preside en la rencontre de la matiere du verre plus quen la figure comme vous scauez si vous en auez grande experience) que de trouuer parmy deux douzaines de verres seulement que jay fait faire le mieux qu'il ma esté possible vn seul qui porte le concaue ou le conuexe moindre que la 100^e partie de sa longeur comme vous dites & je seray tres satisfait quil en porte seulement la 50^e & croiray pour lors auoir la meilleure lunette du monde.

Quant a ce que vous dites que celle de 12 pieds dont vous auez obserue ♄ multiplie 50 fois l'objet, & celle de 24 pieds 100 foys, vous mobligerez fil vous plait Monsieur de Mexpliquer comment vous entendez les multiplications Car je les voys diuersement proposees par plusieurs personnes & a mon sens pas suffisamment determinees. Kepler, Galilee, Scheiner, Sirturus, Fontana & dautres ont donne diuers moyens de mesurer ces multiplications Mais Je seray bien ayse de scauoir quelle a esté vostre Methode a les determiner affin que nous en conuenions doresnauant. la Mienne a este autres foys dauoir vne table quarree d'enuiron 3 pieds sur laquelle je faisois 3 ou 4 lignes descriture noire en champ blanc de differentes grandeurs et grosseurs dont les plus grandes lettres estoient de 8 pouces de longeur. Je la portois 1000 ou 1200 pas ou toises suiuant la Commodite loin de ma fenestre, puis je regardois celle des lignes que je pouuois lire auec la lunette, & mapprochois de ma table jusqua ce que de ma simple veüe je pouuois lire la mesme ligne dou jnferois que ma lunette m'approchoit lobjet du surplus & si elle me faisoit voir de 1000 pas ce que je ne pouuois voir que de 10 Je disoix quelle m'approchoit ou grossisoit lobjet du centuple, d'Autres foys Jay fait ce que Galilee & dautres disent encores de faire paroistre vn Cercle ou autre figure aussi grande a la veüe qu'une moindre paroist auec la lunette puis voir la comparaison de grandeur de lvne a lautre, ce qui ne peut estre commodement pratiqué dans les grandes distances. Ainsi Monsieur vous Mobligerez de me mander quelle est vostre Methode de le determiner comme aussi si vous auez quelque chose de fort particulier sur cette science. Et si vous croyez que la Methode des verres Hyperboliques et Elliptiques puisse contribuer a la pratique & perfection de la dioptrique, vous declarant dabord mon sentiment que je suis persuadé du contraire par raison & par experience, si bien que je fais plus de cas de vos theoremes & regles sur les Circulaires dont vous me parlez que de tout ce quon scauroit dire & faire sur ces autres lignes belles pour la theorie mais jnutiles pour la pratique comme jl y a fort longtemps que je lay publié & commencé des-

[p. 280]

crire ainsi que le Pere Mersenne en fait mention en plusieurs de ses liures mais dautres occupations domestiques mont empesché dacheuer mon trauail & mes experiences des Refractions sur toutes sortes de Corps diafanes solides & liquides que le loisir que jauois ordonnant des fortifications du Haure de grace & Normandie m'auoient³⁾ fait entreprendre lors de la Publication de la dioptrique⁴⁾ de Monsieur des Cartes. deux ou trois moys de temps que jespere tousjours trouuer me mettront a bout. Il ny a point de transparent solide jusques aux sels de Hongrie & dEspagne & aux pieres precieuses dont je ne les aye fort exactement, & parmy les liquides jl ny a point d'Eau desprit ny dEssence dont je naye la comparaison en pesanteur & en refraction. Et ce qui jnterrompit mon ouurage ce fut lesperance que me donna le dit Pere Mersenne & autres qu'on m'enuoyeroit d'vne Eaue mercuriale triple ou double du moins en pesanteur auec lEau forte qui estoit ma plus pesante ce que ayant vainement attendu jay perdu ma chaleur & mes jdees touchant cette matiere dont jay pourtant tout le passé & les memoyres pour en faire vn corps de doctrine nouuelle qui na jamais esté traitté de personne. Mais pour Reuenir au discours des lunettes vous Mobligerez Monsieur si vous y auez quelque descouuerte particuliere de me faire la faueur de me le Mander & jen feray de mesme. Je ne doute point que vous ne scachiez la principale raison pourquoy plus les concaues sont petits plus les lunettes sont obscures & s'il y a Moyen de remedier a cet inconuenient. Et enfin comment on peut paruenir a la perfection des lunettes Car mon auis est que nous ne deuons l'attendre que de la matiere & je ne souhaitte que dauoir loccasion daller a Venize pour apprendre trois ou quatre choses que Personne ne me peut dire que ces ouuriers la. Mais cest assez parle de lunettes Je viens a lHorologerie.

Ce que vous mauez fait lhonneur de Mescrire touchant les difficultez que je vous auois proposé sur laugmentation du poids & force du ressort, me satisfait par lexperience que vous dites en auoir fait mais non pas entierement par la raison, dautant que le pendule estant rigide, & mene en quelque facon par le premier mobile qui est le poids, autant quil peut mener aussi le balancier, la difficulté reste tousjours, quoyque vous disiez fort bien que la regularite & esgalité du Pendule contribue a regler le mouuement. Et ma difficulté est si naturelle que dautres personnes intelligentes & de qualité layant faite comme Moy, quand je leur ay leu la lettre que vous mauez fait lhonneur de mescrire, jlz ont defere a ce que vous dites mais ils ont fait comme Saint Thomas & en ont appellé a lexperience. Ce qui m'oblige Monsieur de vous supplyer treshumblement de men enuoyer le plustost quil vous sera possible vne simple a contrepoids bonne pourtant & excellente comme je croy que vostre Artisan nen doit point faire dautres a Present, en attendant que a loisir il men fait vne sonnante & a ressort suiuant les prix quil ma enuoyez & que

3) Lisez: m'auroit.

4) Voir l'ouvrage cité dans la Lettre N^o. 5, note 7.

[p. 281]

vous mauez escrit qui est 120 liures de vostre monnoye, et pour les simples a poids de 28 a 30 heures comme je veux, 70 liures. Cest donc vne de celles cy que je vous demande de grace au plustost, mais fort bonne car Jen ay dexcellentes ordinaires. Et pour me l'enuoyer bien conditionee, Je vous supplye Monsieur de prendre soin quelle soit bien empaquetee & emballee sechement et par dessus tout enuelopee de toile ciree, parce que jay plusieurs foys esprouué auec perte que des liures globes & autres choses venans de vos quartiers se gastoient a cause de lhumidite de la mer ou du mauuais soin des mattelots. le Premier Vaisseau donc qui viendra en france soit a Dieppe au Haure a Calais Je seray bien ayse quil l'apporte, de la par les roulliers, je le receuray suiuant lAdresse que vous Monsieur, vostre Ouurier, ou Monsieur Vlacq, ou tel autre Marchand quil vous plairra, voudra donner. Et je payeray au porteur de la lettre de change le Prix djcelle, ou en enuoyeray vne a Amsterdam ou ailleurs selon vostre ordre. Et de crainte qu'a la douanne on ne la desballe pour la visiter Je vous prie treshumblement dobtenir de Monseigneur lAmbassadeur ou autres qui le peuuent donner vn certificat comme ce nest qu'une montre, et mesme sil y a quelques droits a payer de sortie ou dentree jespere tant de la bonte de Mondit seigneur lAmbassadeur quil en voudra bien faire ladresse a Monsieur Bouillaud ou a quelqu'un des siens en son hostel de cette ville ou je ljrois prendre. Et vous mobligerez jnfiniment de l'en supplyer de ma Part en luy rendant mes treshumbles respects.

Monsieur Chappellain me sit lhonneur de me dire quil vous auoit escrit⁴⁾ ou vous deuoit escrire pour vne autre pour quelques de ses amys mais jls ne seront point faschez que jaille deuant puisque ce nest que pour vn bien commun que je trauaille & pour leur en donner a tous ljntelligence comme jay commencé, mesmes je fais presentement trauailler a mettre vn Pendule de 3 pieds a vn horloge que jay marquant minutes & secondes, jours du Moys, de la lune & de la semaine, ce qui ne se peut bien faire par vne seule roue puisque les trois mouuements sont differents quoyque vostre ouurier laye dit si ce nest quil veuille entendre qu'vne seule roue ou pignon⁵⁾ mene ces trois choses ce que je fais aussi par les miennes.

Tant y a Monsieur que jattends leffect de vos offres obligeantes, & de la bonne volonte de vostre horologer⁶⁾ auquel jen feray bien vendre dautres a de plus grands seigneurs que Moy, a qui je les feray payer aussi dauantage a son profit, & je luy promets de ne dire a personne la gratification du Prix quil men fera scachant bien quil y en a desia de vendues en cette ville a plus hault prix que les 70 liures dont j'ignore si cest pour son compte, Et si cela est je le peux seruir plus que personne, & les mettant en reputation luy en faire debiter beaucoup par son correspondant⁷⁾ en cette ville qui a trauaille chez luy a la haye, dont vous le pouuez asseurer,

4) Voir la Lettre N^o. 543.

5) Petit semble avoir biffé ces deux derniers mots.

6) Salomon Coster. Voir la Lettre N^o. 543.

7) Hanet, horloger à Paris, qui auparavant avait travaillé chez Salomon Coster à la Haye.

[p. 282]

comme je croy que Monseigneur nostre Ambassadeur vous le pourra aussi dire veu les grandes habitudes que jay a la Cour & aupres de personnes de condition.

Vne des jolies Inuentions de vostre horloge cest quen le remontant jl ne laisse pas de marcher comme en effect jl seroit jncommode le pendule estant arresté de luy redonner tous les jours son branle; lautre qu'on le puisse appliquer a toutes sortes dhorloges desia fait par le moyen de la Roue P. et si les vibrations sont trop larges jl ny a qua baisser le filet ou Centre du Pendule, ainsi je ne trouue pas de difficulté en cela puisque suiuant que le Centre de ce mouuement sera pres ou loin de la maniuelle les vibrations seront grandes ou petites.

Vous me parlez encores Monsieur d'obseruer le diametre du soleil & de la lune, les ascensions droittes & ljnegalité des jours. Il est vray que pour le premier ces astres estant pres du meridien on le peut faire auec deux filets perpendiculaires ou longues piccules [?] fort exactement. Pour le 2_e Je ne scay si la difference des temps sera plus exacte que le Calcul tire par les obseruations de Tycho. Pour le 3^e jl est sans difficulté quil ny a que cette seule methode qui nous en puisse asseurer mais il fault auparauant estre bien certain de la regle qui doit faire la ligne droitte.

Il ne me reste plus qua vous satisfaire sur les nombres que vous mauez fait lhonneur de me demander pour marquer les minutes sur vn cercle mobile. en voicy donc de plusieurs sortes pour de grandes & petites montres de pochette & autres, dont la premiere que je fis faire fut vne montre a 16 heures 12 tours de fusee, la grande Roue 60 dents. la moyenne 48. la roue de champ 48. celle de rencontre 17. tous les pignons de 6. la grande roue ayant vn pignon de 6 menant la roue de quadrant de 54 marquera les heures. & outre cela la dite grande roue en portera vne de 13 ou de 26 qui en menera vne de 9 ou 18 laquelle portant vne aiguille fera vn tour & 1/12 a chasque heure & marquera les minutes sur vn cercle mobile au dehors comme celuy des reueil matins, & la roue de champ portant vne aiguille marquera du coste du balancier les secondes. Mais parce que Je trouuay ce mouuement de secondes trop prompt & jnutile Jen fis faire vne autre dont laiguille des minutes faisoit deux foys son tour en lheure & rencontroit ljndice des heures a toutes les demis, & dautant que ce Cercle nestoit diuise quen 30 chasque minute estoit subdiuisee en sorte qu'on jugeoit facilement des 10 secondes. ses nombres sont 72 pour la grand Roue. 64.58. et tous pignons de 6. la grand roue en ayant vn de 8 menant la roue de quadrant de 32 dents & ayant aussi vne roue de 50 menant vn pignon de 8 portant laiguille des minutes. Pour 30 heures vn tour de fusee. Despuis jen ay fait faire encores vne autre de 28 heures a cote dont je me sers a present ou la grand Roue (outre le pignon de la 2^e Roue quelle mene) en mene encores vn de 6 dents au Centre du quadrant lequel porte laiguille des minutes sans autre chose & cette aiguille fait 4 foys & 1/12 son tour en chasque heure & par consequant le tour estant diuisé en 15 minutes, & chasque minute subdiuisée en 6 Je juge facilement jusques au 2 & 3 secondes sur ma petite montre qui a le quadrant des heures fort grand ce qui est tout lauantage au lieu que les autres qui ont le cercle des minutes ou en dehors ou a coste ont les heures de necessite

[p. 283]

fort petites. Ien ay fait faire vne de table, & deux a Contrepoids ou laiguille des minutes fait 6 fois & 1/12 son tour par heure & rencontrent⁸⁾ par Consequant ljndice des heures diuisees en 6, a toutes les 10 minutes, Ce qui est tres commode & facile a compter, & jen vay faire accommoder vne de celles la si je puis a pendule. Je ne vous enuoye point les nombres de ces dernieres ne les trouuant point a present sous ma main, mais vous les rencontrerez aysement par le moyen des autres, seulement je vous diray questimant beaucoup les Pignons de 8, la derniere que jay fait faire les a tous & a lanterne cest adire percez a jour & cest la 2^e Roue qui porte les minutes & chasque coup de palette est vne seconde, ainsi mon Pendule aura 3 pieds comme vous desirez le vostre. Je serois trop long & ennuyeux si Je vous entretenois dauantage sur cette matiere & Je suis bien marry que je ne vous puisse enuoyer presentement la description & la figure de Celuy de Strasbourg Je ne lay point encores faite. Ce sera pour vne autre foys. Cepandant Je me Recommende a lhonneur de vos bonnes Graces & vous supplye treshumblement, qu'en maccordant celuy de vostre Amitie, Jaye au plustot vne montre de vostre choix. je suis de tout Mon Ceur & sincerement

Monsieur

Vostre treshumble & tres affectionne seruiteur P. Petit.

A Monsieur Monsieur Christien Hugens a Zulichem A la Haye.

12

8) Lisez: rencontre.