Briefwisseling van Hugo Grotius. Deel 3

[p. 216]

1206. 1627 december 23. Aan Willem de Groot¹.

Scripsi, frater charissime, octo jam sunt dies ad patrem, sed et quae ad te magis etiam quam ad ipsum pertinerent. Hoc ipso die tuas accipio datas 28 Novembris: miror tam sero perlatas et in prioribus literis ea super re meas conjecturas ac consilia exposui.

De Britannorum clade et abitu omnia ordine affini Reigersbergio exposueram² et quia temporis angustiis prohibebar ad te scribere nec satis justa erat causa multiplicandi literas, ipsum rogaram, ut tibi partem faceret.

De legatione nostra non immerito vereris, ne sit βϱαδύπους χάϱις³. Quid in freto Cimbrico futurum sit, discere avebimus. Res magna est et multum momenti in celeritate positum, antequam imperator⁴ vires Ansiaticas secum trahat.

Ex Mairio⁵ rogo resciscas, an editionem⁶ suscipere velit et quo tempore, ut deliberem, an tanti sit exspectare. Etiam ut penetres velim illud quicquid quantumque est de Institutionibus⁷; si ita se res habet, magnum est flagitium, quicunque id in me admisit. Quid opus factu sit, postea videbimus. De Iacchaeo⁸ intermittendum est. Nam is, cujus agebam negotium, hac spe abjecta alias aggressus est. Libros meos⁹ et recens recusa exemplaria¹⁰ exspectabo. Montacutius¹¹, qui res Britanni in Lotharingia et Sabaudia egit, nunc est in carcere Bastiliano. XLIV Anglica vexilla in ecclesiae hujus urbis cathedrali pendent additis machinis quatuor.

De Rupella varia sunt judicia. Nam alii arctatum aggesta utrinque humo portum porro demersis navibus lapide oppletis et catenis claudi posse sperant, alii ventorum et fluctuum incerta, eruptiones, etiam novam ab Anglis classem metuunt. Urbs intus alimenta in annum habet et hactenus mari praedas agit. Riceliacus vere venturo promittit sibi naves CCL, in quas menstrua L florenorum millia impenduntur. Mitto ad te testimonium de vita Mariae¹², cui tu addes de Zelandia mittendum de Diderico¹³, et simul duas cartulas mea manu signatas, quibus superscribes apocham ad eam, quae nunc in usu est formulam.

Parentes et proximos officiose salutamus ego, uxor et liberi.

23 Decembris 1627.

1 Gedrukt Epist., p. 810.

2 N^o. 1195.

3 Het gezantschap van Fr. van Aerssen en Caspar van Vosbergen; zie n^os. 1203 en 1204. De woorden βϱαδύπους χάϱις stammen van een Grieks epigram, waarvan de vertaling bij Ausonius, in de editie van Peiper epigr. XVI [LXXXII] van de Epigrammata Avsonii de diversis rebus; zie Decimi Magni Avsonii Bvrdigalensis Opvscvla, recensuit Rvdolfvs Peiper. Lipsiae MDCCCLXXXVI, p. 316.

4 Ferdinand II.

5 De Leidse uitgever Jean le Maire.

6 Ik vermoed een nieuwe uitgave van De iure belli ac pacis; zie n^o. 1172, p. 169 n. 6.

7 Zie n^o. 1143, p. 125 n. 1.

8 Zie n^o. 1166 in fine.

9 Zie n^os. 1163 en 1175.

10 Van De Veritate religionis Christianae; Ter Meulen-Diermanse, n^o. 944.

11 Walter Montaigu; zie n^o. 1200, p. 205 n. 1.

12 Maria de Groot, geb. 16 april 1617, overl. 16 maart 1635.

13 Zijn zoon Dirck.