Briefwisseling van Hugo Grotius. Deel 9

3637. 1638 juni 19. Aan J.A. Salvius⁷.

Excellentissime Domine,

Pro iis quae Excellentia Vestra mihi significavit 21/31 Maii⁸ gratias habeo ingentes. Opus est hoc maxime tempore edoceri me de iis, quae in illis geruntur partibus, ut nostrorum exemplo et aemulatu excitentur Galli.

Quae ad Lauwenburgicos⁹ scripta sunt a regina¹⁰ quaeque Excellentia Vestra respondit caesarianis¹¹, habebunt jam Galli per Davausium¹². Alioqui ego illis daturus fueram, ut hoc quoque amicitiae testimonio magis adstringatur federis fides.

Mitto formulas literarum pro tuto itinere legatorum Suediae¹³, item Germanorum¹⁴, quales mihi dedit Venetus¹⁵. Ego vicissim eum participem feci responsi illius, quod Excellentia Vestra Lubecam misit, ut videant et socii et pacis suasores aperte a nobis simpliciterque agi. In illa pro legatis Suedicis formula, si nomen reginae adjiciatur ad coronae nomen, puto non multum desideraturos rectores

7 Gedrukt Epist. p. 441. Antw. op no. 3608. beantw. d. no. 3660? Johan Adler Salvius was Zweeds gezant in Hamburg.

8 No. 3608.

9 Franz Albrecht, Julius Heinrich en Franz Karl, hertogen van Saksen-Lauenburg.

10 Christina van Zweden.

11 Ferdinand Siegmund Kurz en Dr. Johann Söldner.

12 Claude de Mesmes, graaf van Avaux.

13 Zij waren, voorzover mij bekend, nog niet aangewezen.

14 Zij waren, voor zover mij bekend, nog niet aangewezen.

15 Anzolo Correr, Venetiaans gezant in Parijs.

[p. 394]

nostros¹, ad quos eam misi. Altera pro Germanis paci procurandae minus idonae est inserta criminis exprobratione. Alioqui ut Germani non ipsi sua proferant desideria, sed per Suedos Gallosque legatos², tolerabile videri potest. De praeparando ad inducias negotio sensum suum perscriptum nobis dedit haec aula. Sed cum pro millione, quem mandata mihi data posci jubent, semissem ejus polliceantur, rem integram servavi regentium consultationi.

Nuntios de transitu militis e Suedia deque Bannerii³ conatibus exspectabimus, et quo versurus sit se refoto jam exercitu Galassius⁴, et an sine vi sit abitura classis Suedicae Danicaeque ad Varni Ostia vicinitas. Praeterea quid acturi sint tam illustres e Dania legati⁵.

De imperatoris titulo, quantum video non ultro controversabuntur Galli, si modo illud et de tuto itinere pro Germanis comiter transigi possit. Mihi certe nullus videtur probabilis color denegandi Ferdinando⁶ honorem, quem ei dedit Germania, probavit Roma, agnoscunt Suedia, Anglia, etiam dux Vinariensis⁷ nullo electorum⁸, quos quidem pro electoribus Gallia agnoscat, refragante.

Addam huic epistolae pia vota pro bona pace proque Excellentiae Vestrae valetudine rebusque prosperis, utpote.

Excellentiae Tuae observantissimus semper
H. Grotius.

1 Voor hun namen zie men no. 3424, p. 40 n. 1.

2 Voor de namen van de Franse gezanten zie men no. 3407, p. 7 n. 11.

3 De Zweedse veldmaarschalk Johan Gustavsson Banér.

4 Matthias, graaf Gallas, keizerlijk bevelhebber.

5 Albret Skeel en Christian Thomesen Sehested; zie p. 341.

6 Ferdinand III.

7 Bernhard, hertog van Saksen-Weimar.

8 Voor de namen van de keurvorsten zie men no. 3422, p. 35 n. 10.

Lutetiae, 9/19 Iunii 1638.