Oeuvres complètes. Tome I. Correspondance 1638-1656

[p. 512]

N^o 349.
Fr. van Schooten à Christiaan Huygens.
20 Novembre 1656.

La lettre se trouve à Leiden, coll. Huygens.

Clarissimo Viro Juveni Domino Christiano Hugenio, Fr. à Schooten S.D.P.

Nuper mihi per Ducquium nostrum, Amicissime Hugeni, exemplarium copia Epistolae tuae ad Ainscomium facta est, pro quibus tibi maximas gratias ago. Ipsas enim cum hìc nusquam venales offenderem, in causa fuit quòd non solum plures hìc, quibus eam communicaveram, desiderarent; sed etiam illam alijs alibi degentibus, qui ipsam à me efflagitabant, transmittere non potuerim. Binorum namque exemplarium, quibus me donaveras, alterum Clarissimo Lipstorpio jam obtuleram; ita ut unicum illud, quod mihi reservaveram, non lubens alteri concesserim. Haud ita pridem literas ad Dominum Mylonium dedi, quibus ipsi inter alia indicavi, Dominum Bartholinum nuper hîc mihi binos tractatus Analyticos Domini de Beaune, ad umbilicum jam perductos ostendisse, qui illis, quos Dominus de Carcavi ante aliquod tempus ad nos misit, perfectiores existunt. Ostendit item ejusdem tractatum de Mechanicis, qui non minus mihi ingeniosus videbatur, cujusque figuras Vir Clarissimus Dominus de Hardy¹⁾ suis sumptibus caelandas procuraverat. Vidi praeterea apud ipsum et 3 tium dicti de Beaune tractatum acutissimum de angulo solido, cujus figurae, propter linearum multitudinem, quae in ijs conspiciebantur, aeri forent incidendae. Quae quidem omnia Dominus Bartholinus, quàm primum ubi domum venerit per feriàs ex Gallico idiomate, quo conscripta erant, in Latinam linguam transferre suscepit. Haec enim cum Elsevirij Amstelodami Gallicè typis suis mandare prius non decreverint, quàm postquam introductio et commentarij mei in Latinum simul idioma fuerint conversi: omnino gavisus sum haec ab ipso fuisse suscepta, quippe illi non tantum haec jam dudum fuêre perspecta, sed illa etiam ab ipso (dum omnia Domini de Beaune monumenta possidet) omnium perfectissima sint speranda. Quatenus Paillierij²⁾ methodum de Cubicarum Aequationum constructione, haec scripseram:³⁾

Quibus Dominus Mylon inter alia sic respondit:⁴⁾

Quocirca cum Dominus Mylon probet, ut, si mecum judices dictam Methodum haud esse generalem, illa non imprimeretur: volui eandem, à te ante nisi obiter inspectam, denuo tibi examinandam transmittere, quò et tuum de illa judicium

1) Sur Claude Hardy voyez la Lettre N^o. 91.

2) Le Pailleur, car tel est son nom (Voir la Lettre N^o. 306).

3) Cette lettre de Fr. van Schooten à Cl. Mylon est la Lettre N^o. 350.

4) Cette lettre de Cl. Mylon à Fr. van Schooten est la Lettre N^o. 351.

[p. 513]

ferres. Pro vectura autem quid solveris cum nil mihi constet aut quicquam scripseris; credidi illa à te per amicum aut bibliopolam fuisse accepta; haud aliter atque plura à Domino Gutschovio alijsque mihi transmissa sunt, ita ut pro ijs simulque a Wallisio missis acceptum referrem. Hoc autem cum longè aliter factum esse intelligam⁵⁾, rogo, ut numeratam pecuniam indicare mihi haud graveris, quò eam tibi in integrum restituam, unaque, ut decet, gratias agam: quandoquidem ego ista à Domino Mylonio et Domino de Carcavy efflagitaveram. Caeterum dum Ludovici et Danielis Elsevirij typis Cartesij opera Philosophica denuo prodierunt correctiora, ac in ijsdem praeter erratorum, tam in textu quam in figuris, in praecedentibus impressionibus illapsorum, emendationem, etiam paucae quaedam meae animadversiones accedunt, in quibus et tui facio mentionem: aequum duxi ut hac de re te commonefacerem, cum illa, quae ibidem attuli à te mihi olim quidem per literas fuerint communicata. Vale ac me amare perge.

Lugd. Batavorum 20 Nov. 1656.

Quidquid de Paillierij Methodo judices, utrum scilicet illam generalem censeas aut eandem facili negotio illuc perduci posse perspicias, nec ne: omnino tibi Mylonio scribendum relinquo; unà cum meis hisce insertis, quò tuam super hac re sententiam resciscat. Iterum vale.

Clarissimo, Nobilissimoque Domino Christiano Hugenio, amico plurimum colendo

amicâ manu.

Hagae.

5) Voir la Lettre N^o. 351.