Latijnse gedichten 1607-1620

[p. 216]

(131 Amaryllis (Latijn) (Vervolg))aant.

confudisse greges et confudisse Britannos,
silvarum Silvander amor laudasse canentem
non neget et docuisse suas Amaryllida ripas.
Da veniam, venerande senex, tua rura, paternos
pertaesi remeamus agros, Amaryllida ripas
nunc quoque, sed duram docturi Amaryllida ripas.
Sat miseros vixisse domi, iuvat esse Britannos
si sterili Batavos decet insudare furori.
Da faciles in vela Notos, substerne benignas,
salse sali dominator, aquas. Deducite maesto,
Nereides, pastore gravem per caerula puppim;
Thyrsida vectorem vehitis: subsidite, fluctus.’

moeris: ‘Thyrsida pastorem rapitis: subsidite, venti.

Aeole, seclusos cohibe compagibus Euros;
obice retrorsum Zephyris mare, Neptunine;
da remoras, Melicerta, rati; da monstra procellis,
Cymothoe; da, Glauce, breves sub gurgite Syrtes.
Annuitur. Commota pari conamine crimen
numina ferre negant. Ipsus, ne conscius esset,
fortior adversas Tamisis devolvit arenas.
Dira minatur hiems. Iam te, timet ipsa videri
Cynthia, ne videat. Condunt pia nubila caelum;
Thyrsi, nec hunc solem, nec habebis sidera testes.
Quid iuvat adversos rapere in tua funera divos?’

thyrsis: ‘Moeri, per hunc solem, per quae mihi sidera testes,

obicis adversos passis Amaryllida divos?
En ego post ignes undam, post Cypridis iras,
despicio, Theti dura, tuas. Si, fata, iubetis,
naufragus extremum subiturus in aequore casum.
Ut videas, Amarylli, tamen; Sceverinaque longe
securos comitata greges per litora spectes
(si pote) non duro morientem Thyrsida vultu.
Quae pelagi pietas: miserebitur unda perempti.
Forsitan haec eadem quae rettulit unda peremptum
Alcyonae Ceyca suae miserebitur et te
invitos super ora pedes invisa iubebit
ponere et has etiam: ‘Miserandum Thyrsida’, voces
addere et has etiam: ‘Quid erat prae Thyrside Mopsus?’

Plura puer fudisse parat, cum plura paranti

nuntiat optatis intendi carbasa ventis
ponticolum clamosa cohors. Levat anchora dentem,
vela viri. Fugiunt ripae; volat ocior Euris