Latijnse gedichten 1607-1620

[p. 192]

(120 Constantini Huygens in Angliam abituri ad patriam tumultuantem (Vervolg))aant.

Hic ego de patriae surgentes funere planctus

(mentiar astra duint) eminus aure legam.

Hic ego, fata meos maneant quaecumque Batavos,

ut modo ne civis sim miser, exul ero.

Hic ego regales - mundi miracula - turres,

hic ego reliquias, Elisabetha, tuas,

hic ego Romuleas aequantia marmora moles

percontante novus lumine suspiciam.

Hic ego Cambrigias porro, mea summa, Camenas,

vota, salutandi sedulus hospes ero.

Hic ego - nunc animo, tum corpore iunctus amicis -

fundar in amplexus, Caesar amate, tuos.

Iurgia, dissidium, rixae, furor, ira, valete;

pax trabeata, vale; pugna togata, vale.

Avehor; aura vocat. Pacata Britannia, salve;

magne Britannorum rex, Iacobe, fave.

Constanter.
Hagae Com., 8^o Kal. Iun. 1618.