Latijnse gedichten 1607-1620

[p. 190]

(119 Constantini Huygens ad iuventum Ziricaeam elegia (Vervolg))aant.

Iam dudum patriis animo procul evehor oris,

iam mare, iam terras ultima mente lego:

Hesperidum hinc populi, hinc Phoebo subiecta recenti

regna manent oculos conspicienda meos;

Parthenopes iam nunc avido obversatur imago

et cinis imperii, perdita Roma, tui;

et quae Caesareo pares, Germania, sceptro

et modo feminea Gallia quassa manu;

quique per occiduos, Tamesis, devecte Britannos

iuncta colosseo litora ponte lavas.

Aurea libertas, quae non lustrabimus arva?

Quanta sub hos oculos te comitante cadent!

Aurea libertas, priscis adamata Batavis

cum socias iunxit foedere Roma manus,

aurea libertas, superum data munere terris,

quis tibi, quis sanus, vincula praetulerit?

Aurea libertas, tibi me voveoque dicoque;

tu quoque ne gressus desere, diva, meos.

Circaei iuvenes, heia, procedite; cedo

qui modo rivalis nomine notus eram.

Subdite colla iugo, cippo date crura beato -

non facit ad Batavum calceus iste pedem.

Constanter.
Ziricaeae, prid. Kal. Apriles 1618.