Latijnse gedichten 1607-1620

[p. 148]

(99 Nobilissimus amplissimisque viris consiliariis status confoederatarum Belgii provinciarum felix anni exorientis initium optat Constantinus Huygens (Vervolg))aant.

At quorum auspiciis (si quis mortalia prudens

inspiciat), quorum viribus, auxilio?

Horum, certe, horum, quos postera nulla tacebunt

sive puellarum carmina, sive virum.

Ergo ego tantillo ingratus non digner honore

quos dedit afflictis caelica cura patres?

Pol! Mihi si totus liceat satiarier ardor

praecipitique rota quo rapit ille feri,

dispeream si non faustas optare Kalendas

impiger immensa niterer Iliade!

At vero Icarios aequum est vitare volatus,

qui timet Icarii dedecus excidii.

Ergo, Musa, tace. Lectis cadat ancora velis,

ne feriat teneram durior unda ratem.

Vobis interea, patriae spes, lumina, patres

(ne loquar hac temere dissona verba die),

omnia contingant, quaecumque Hispanica vestri

invideat vobis gens inimica boni.

Quisquis es, innumeris corrade poemata votis:

an poteris longo carmine plura loqui?

17, 1613.