Latijnse gedichten 1607-1620

[p. 76]

(65 Οδοιπορικον iteneris Amstelreodamensis (Vervolg))aant.

Ast ego dum genitor consolans assidet aegro,

nunc hos, nunc illos inviso laetus amicos.
Et nunc ad templum, nunc rursum ad litora tendo et
aspicio immensas solventes litore puppes,
hinc quoque ad aegrotum. Vacuum sic transigo tempus.

At pater interea: ‘Venit iam tertius,’ inquit,

‘Constantine, dies dum nos hic, ecce, moramur
nec mage cognati video crudescere morbum.
Vellem igitur, ventis si placatum mare, si non
adversi flarent Zephyri, iam, nate, reverti;
ad nautas saltem properemus eosque rogemus.’

Imus et ad littus veniens pater: ‘Heus age,’ clamat,

‘heus age responde, placet hoc qui, navita, caelum,
qui tibi tempestas, quinam tibi ventus?’ At ille:
‘Creber agens hiemem vasto ruit aequore turbo
atque ego vix ausim tali dare carbasa vento
aere, sed si quis mecum se credere ponto
audeat, ecce, sumus puppis nautaeque parati.’
Sed nos inde domum decedimus, ire negantes.
Unam istic etiam terimus noctemque diemque.

Postera Phoebea lustrabat lampade terram

humentemque Aurora polo dimoverat umbram.
Adversi spirant commixta grandine venti,
ad naves valedicentes tamen omnibus imus.
Deducunt nautae navem refluentibus undis.

Iamque propinquabat qua se transmittere terra

uncta carina solet. Puppi hic descendimus alt[?a].
Accingunt omnes operi celeresque rotarum
subiciunt lapsus et stuppea vincula collo
intendunt; ingens ascendit machina terram.
Conclamant nautae funemque attingere gaudent,
sufficiunt clamore animos. Illa usque minatur
et malo concussa tremit. Mox praecipitem se
deicit in fluctus. Accurrunt undique nautae,
accurrunt iuvenes, pueri innuptaeque puellae
vectoresque alii; meliorem prendere primus
quaerit quisque locum. Dum nos in litore stantes
cernimus haec, gemitus imo de pectore ducens,
sic tremulus patrem dictis affabar amicis:
‘Consurgunt venti atque in nubem cogitur aer
et mare turbatum stridet refluentibus undis.
Hoc igitur supplex, genitor carissime, posco,
si bene quid de te merui, fuit aut tibi quicquam