Briefwisseling van Hugo Grotius. Deel 8

3042. 1637 april 24. Aan S. Bielke⁴.

Illustrissime Domine,

Ad ea, quae postremum scripsi⁵ haud multa addam, ne occupationes Illustrissimae Dominationis Tuae semper graves, hoc vero tempore gravissimas, onerem aut verborum inanibus aut rerum exiguis.

Post res Galliae afflictas in Valle Telina magno Italiae nec minore Germaniae malo Sabaudus⁶ Bremo, Casali Mantuanus⁷ haud immerito timent videnturque de Parmensis⁸ facto non ita male sentire, ut non nisi celeriter succurratur, hic quidem pari via se liberaturus sit periculis, ille autem impleturus quorum pridem suspectus est.

Mittuntur eo copiae intereaque in Margaritae insula pugnatur jamque Galli praeter primos ab exscensu successus parvo castello quodam et aquae dulcis, quae ibi rara, puteo potiti sunt. Sed nova et ibi dissidia inter sacerdotem et militem archiepiscopum scilicet Burdegalensem⁹ et Harcurtium¹⁰ dissidia interjiciunt se rebus minime ejus mali egentibus.

Dux Bernhardus¹¹ caesia per milites suos in Burgundiae comitatu cohortibus sive regimentis duobus et pecunia hic accepta laetus quaerit undique machinis trahendis equos, ut expeditioni animo sane magno se paret.

Davausius¹² valedixit amicis, etiam mihi, mitti se ad pacem communem fabricandam profitens. Hamburgumne prius an Coloniam iturus haud dixerim.

4 Gedrukt Epist., p. 323. Wellicht een der brieven beantw. d. no. 3058. Over geadresseerde zie men no. 2945, p. 67 n. 7.

5 No. 3030.

6 Vittorio Amedeo, hertog van Savoye.

7 Carlo Gonzaga, hertog van Mantua.

8 Odoardo Farnese, hertog van Parma.

9 Henri d'Escoubleau de Sourdis, aartsbisschop van Bordeaux.

10 Henri de Lorraine, graaf van Harcourt-Armagnac.

11 Bernhard, hertog van Saksen-Weimar.

12 Claude de Mesmes, graaf van Avaux.

[p. 240]

Solet enim haec aula consilia sua implicare et ipse satis est coelans sui. Ubi agat Illustrissima Dominatio Tua et cum marchione Sigismundo¹ nihil peractum dixi ei. Brissacum multum pecuniae venit ad commeatus coëmendos.

Veneti ad pacificandum se nobis ingerunt. Respondi eorum legato² itemque Davausio, ita ut Avaugurio³ in Suedia responsum est.

Imperatorem hunc novum⁴ - si tamen sic appellandus est - ab iesuitarum consiliis alieniorem esse quam fuit pater⁵ passim creditur. Eodem ibit, sed alio itinere.

Anglorum in negotio nihil promotum est, quod quidem nos norimus.

Opto, Illustrissime Domine, Illustrissimae Dominationi Tuae rebusque Suedicis omnia prosperrima.

Illustrissimae Dominationi Tuae addictissimus
H. Grotius.

1 Sigismund, markgraaf van Brandenburg.

2 Alvise Contarini di Nicolo.

3 Charles Du Bois, baron d'Avaugour.

4 Ferdinand III.

5 Ferdinand II. Hij was gestorven op 15 februari 1637.

Lutetiae 14/24 Aprilis 1637.