Briefwisseling van Hugo Grotius. Deel 7

2674. 1636 juli 18. Aan L. Camerarius³.

Illustrissime Domine,

Post victoriam ad Ticinum, quae Mediolanenses valde exterruit, exhilarat nos Hanovia obsidioni plane exemta, ut nos literae XXVI Iunii Francofurto datae docent. Laus operis landgravio Wilhelmo⁴ asscribitur, quem adfuisse, quanquam affirmantibus literis, multi non credunt, sed a Leslaeo⁵ et Melandro⁶ rem peractam. Lambojum⁷ deceperant et Wolfii⁸, qui Darmstadiensi⁹ inservit, literae vanum de adventu hostili rumorem dicentis et exploratores Lamboji ipsius capti a nostris et cum falsis nuntiis, quos se perlaturos juraverant, reversi, qui triduo non posse hostem adesse ei persuaserant. Interea magna auxilia exspectabat; improviso superventu exutus est castris, ipse equitatu primum disjecto, peditatu pugna acri superato cum suorum mille Steinhemum profugus, ubi machinis oppugnatur et, credo, jam coactus est se locumque dedere cum II ^m saccis farinae Maguntiacum destinatae.

Hanoviae de necessariis omnibus abunde provisum. Dola adhuc obsidetur. Venere in comitatum Burgundiae Croati et cohors Germanorum caesariana¹⁰. Poloni caesariani, qui itidem ex Luxemburgico veniebant¹¹, in agrum Bipontinum incubuere.

Tabernarum suburbia tenet dux Vinariensis¹² et in valli, quo oppidum cingitur ruinis, militem locavit. Eo capto restat urbs vetus et arx infirma opere, fossae expers.

3 Copie Den Haag, ARA. Eerste afd. coll. Hugo de Gr. Aanw. 1911 XXIII no. 2. p. 40. Gedrukt Epist., p. 247. Geadresseerde, Ludwig Camerarius, was ordinarius Zweeds gezant in Den Haag.

4 Wilhelm V, landgraaf van Hessen-Kassel.

5 Alexander Leslie, later graaf van Leven; zie V, p. 420 n. 2.

6 Peter Melander, graaf van Holzapfel; zie no. 2553, p. 90 n. 11.

7 Wilhelm, baron van Lamboy; zie no. 2665, p. 250 n. 15.

8 Dr. Antonius Wolf.

9 Georg, landgraaf van Hessen-Darmstadt.

10 De troepen van keizer Ferdinand II.

11 Dit woord ontbreekt in de tekst der Epist.

12 Bernhard, hertog van Saksen-Weimar.

[p. 261]

Scribuntur nostrae Hassicaeque copiae ad Moenum, quem ponte junxerunt, esse ad MD loricatos, III ^m levius armatos equites, draconarios MD, carabinos III ^m, VII ^m peditum, VII machinas majores, minores XII cum mortariis, quae vocant, nonnullis.

Post captam Capellam in illa regione nihil promovit¹ hostis validioribus circum praesidiis quam ut facile tententur. Praefectus Capellae qui fuit², reus fit ignaviae. Mittitur in eas partes Bressaeus³ cum milite et excitatur e Normannia locisque aliis nobilitas acrius in comuni ac propinquo periculo pugnatura. Ac spes est penetrantis mali sensum causam fore, ut multa segnius curata antehac emendentur. Illud valde mihi dolet, quod Tabernarum oppugnatio post Iacobum comitem Hanoviensem⁴ etiam tribuni Heibrunni⁵ morte nobis constitit.

Caletenses naves quatuor Angli captivas abduxere, ut damnum⁶ suarum, quas Galli partim in Flandriam, partim in Hispaniam euntes in praeda habuerunt, resarcirent.

Haec nos hactenus, vestris quae gerantur in partibus, dudum est, quod nobis notitiam invident venti⁷. Avebo cum bonis publicis tum quoque privata cognoscere.

Lutetiae, XVIII Iulii novi Cal. MDCXXXVI.

1 De tekst der Epist. heeft m.i. ten onrechte ‘promovet’.

2 René, baron Du Bec-Crespin; zie no. 2673, p. 259 n. 10.

3 Urbain de Maillé, markies van Brezé.

4 Jakob, graaf van Hanau-Münzenberg.

5 John Hepburn; zie no. 2620, p. 185 n. 1.

6 De copie in Den Haag heeft abusievelijk de lezing ‘demum’.

7 Dit woord ontbreekt in de copie te Den Haag.

Adres: Ludovico Camerario, Reginae Regnique Sueciae Consiliario et Legato apud Praepot. Ord. Foeder. Belgii.