Briefwisseling van Hugo Grotius. Deel 4

1508. 1630 mei 31. Aan Willem de Groot².

Plurimum tibi, frater optime, debeo pro eo studio, quo liti nostrae³ institisti. Quid tibi dem pro palmario. Meipsum jamdudum tuo jure possides, sed quo minus praesente fruaris, impediunt οἱ ϰϱατοῦντες. Dabo igitur me, sed quomodo possum, id est, in imagine quam propediem exspecta. Placet quod multi hoc qualicunque injuriarum nostrarum levamento se ostendunt delectari.

Consuetudinem Normannicam, qua de scribis, puto esse generalem et in rem scriptam, ut ratio non habeatur undecunque pecunia processerit. De venditione credo non esse, cur id optet filius. Sed ipse docebat ϰέϰϱισϑαι. Sed solet esse οὐϰ ἀμετάβλητος. Nisi de codicillis fidem impleat videtur melior longe conditio fore τῶν ἐξ ὑστεϱογαμίας.

Schickardus⁴ literas Hebraeas Tubingae profitetur magna cum utilitate studentium. Dedit nobis ךלמה טפשמ id est, jus Hebraei regis⁵, opus exactissimum et plenum lectionis Thalmudicae et rabbinicae. Post mortem Buxtorfii⁶ haud dubie primas fert in illis literis. Dedit etiam genealogiam regum Persarum ex Turcico⁷, historicae et geographicae observations copia refertam; in mathematicis multus est, diligens astrorum notator, tabularum geometricarum emendator et dignus, cujus diligentia adjuvetur. Indicium ipsi feci de Golio⁸, de quo omnia maxima exspectat. Fac si quid potes, ut videat nos quoque favere literarum cultoribus. Marmolii tomos⁹ hic habemus.

Rex post Chamberium potitus est Rimiliaco, Nissiaco, Clarimontio. Nunc itur ad oppidum cui e Confluenta nomen. Spinolae filius¹⁰ incepit Casale cingere magis quam obsidere. Interim nec pacis colloquia dormiunt, sed Hispanus isti praedae inhians videtur ducere negotium.

Vale cum parentibus, uxore¹¹, liberis, amicis.

31 Maji 1630.

Tui amantissimus frater
H. Grotius.

2 Gedrukt Epist., p. 829.

3 Vgl. n^o. 1506, p. 209 n. 7.

4 Wilhelm Schickard; zie over hem n^o. 1366, p. 10 n. 7.

5 Jus regium Hebraeorum e tenebris rabbinicis erutum, et luci datum. Argentorati 1625.

6 Johan Buxtorf; zie n^o. 1371, p. 15 n. 9.

7 Tarich, hoc est series regum Persiae per annos fere quadringentos. Tübingen 1628.

8 Jacobus Golius; zie III n^o. 1337, p. 408 n. 9.

9 Luis del Marmol y Carvajal, Spaans historicus uit de 16^e eeuw. Hij schreef Descripción general de Africa, sus guerras y vicisitudes, desde la fundación del mahometismo hasta el año 1571 in drie delen; de beide eerste zijn verschenen in Granada in 1573, het derde in 1599 te Malaga.

10 Felipe; zie n^o. 1506, p. 212 n. 4.

11 Alida Graswinckel.