Briefwisseling van Hugo Grotius. Deel 3

1103. 1626 oktober 27. Aan Jan de Groot⁴.

Per Pijnackerum⁵ missurum me quae his inclusae sunt literas⁶ putaveram. Sed ille nimium diu abiturit. Itaque per tabellarios has curare statui hoc addito tuas, quas sexto hujus mensis dedisti, recte ad me perlatas. Espessius⁷ adhuc in menses ferme octo mansionem obtinuit auctoritate Defiati⁸, qui apud cardinalem⁹ in magna est gratia.

De sorore¹⁰ utinam meliuscula intelligam. Uxoris res in eodem sunt loco. Capsam missam gaudemus et rogamus ut de butyro quoque festinetur quantum potest.

Ubi Pijnacherus venerit, vide caute cum eo agas. Multum enim debet his, qui nunc regnant. Novae hic querelae sunt de Anglis ob captas mercatorum Gallorum naves hoc praetextu, quod in Hispaniam irent aut ex Hispania redirent.

Aliud nihil habemus. Nicolaus¹¹ noster Pijnachero se in ministerium dedit. Gaudeo patri ejus meam benignitatem probatam.

Deus te, matrem, sororem et alios nostros sospitet.

Lutetiae 27 Octob. 1626.

Tuus totus tibi obedientissimus filius
H. Grotius.

4 Gedrukt Epist., p. 793.

5 Zie n^o. 1099, p. 73 n. 10.

6 N^o. 1102.

7 Zie II, p. 334 n. 3.

8 Zie n^o. 1061, p. 29 n. 10.

9 De Richelieu.

10 Adriana, naar wier gezondheid hij ook in voorgaande en volgende brieven telkens vraagt.

11 Zie n^os. 1096 en 1057.