Refereinen en andere gedichten uit de XVIe eeuw

verzameld en afgeschreven door Jan de Bruyne

[p. 15]

- XCII - [Gelyc Godt liet diversche partyen]aant.

Gelyc Godt liet diversche partyen
int lant van belooften, die met lyen
diesraelsche waeren persequerende,
om dat sy soo souden leeren stryen,
& haer met strydt souden syn exerserende;
diesgelyck is ons hier temterende
tvlees, de weirelt, & den vyant duer nyt;
waer tegen elck hem moet syn verwerende,
die victorie begeert naer desen tyt.
Dus, o menschen, die hier bestreden syt
van dese voernoemde oft dier gelycke,
stryt vromelyc, soo en crychdy geen verwyt,
& perfevereert, & slaet Godt geen swycke;
ghy crycht victorie & deeuwich rycke;
want soo ons devangelisten vercleiren
& diversche leeraers autentycke:
die wilt glorieren // moet persevereren.

[p. 16]

 

Wettich elck stryen & persevereren moet

 

tegen alle temtacie, die stryt aendoet.

 

Soo, wie naemaels wilt victorie verwerven,

 

met oprecht geloove & vast betrouwen goet,

 

moet elck in vieriger lieffde leven & sterven;

 

met persevereren sal sulcke beerven

 

Godts rycke; syn heyligen hebbent hier duer ontfaen.

 

Wie contrarie doet, tis syn bederven,

 

als Sawel, Judas, Lucifer, die weken saen;

 

maer die stryende volstandig op Godt staen,

 

als Sidrach, Misach & Abdenago cloeckmoedich,

 

& als de Machabeen, sonder affgaen,

 

met geloove, betrouwen & lieffde gloedich,

 

totten eynde persevererende bloedich,

 

en Eleasar, wie cost haer veroveren?

 

duer tpersevereren, was haer Godt behoedich:

 

die wilt glorieren // moet persevereren.

 

 

 

En vreest niet, maer betrout, spreckt Godt almachtich:

 

ic ben met u, en wyckt niet, stryt manachtich:

 

die u bestryen zullen worden beschaemt.

 

Duer tpersevereren, verwandt Davidt crachtich

[p. 17]

 

Goliath; Joseph bleef hier duer ongeblaemt;

 

desgelycx oock Susanna, die eerbaer bleef befaemt.

 

Dappostelen waren de weirelt verwinnelyck;

 

duer tvast betrouwen, hebben sy, soot betaemt,

 

vromelyck gestreden duer lieffde minnelyck;

 

verheven syn sy seraphinnelyck,

 

duer tpersevereren, vroech & spade,

 

en hebben van Godt ontfangen minnelyck

 

des levens croone, duer syn genade.

 

Soo sal oock een ieghelyc, tsy van wat sade,

 

die duechdelyc leven naer Godts begeeren;

 

maer die haest verflaut, crycht jammerlycke schade:

 

die wilt glorieren // moet persevereren.

 

 

 

prinche.

 

 

 

Prinche Christus, ons wys beradere,

 

heeft ons verlost duer syn goede adere,

 

vernielende inden stryt thels serpent.

 

Weirelt, doot, sonde, verwant hy te gadere,

 

victorieuselyc & al thels torment.

[p. 18]

 

Tpersevereren was dexpedient

 

dat ons gevryt heeft van sinertige qualen;

 

dus leyt smenschen victorie, meest ooc present,

 

uit persevereren princepale,

 

van dwettich stryen tot int finale;

 

want wie Godt syn ryc belooft, is altyt tverstant;

 

persevereren sy, soo ic voer verhale.

 

Hier sonder en is geen victorie vaeliant.

 

Paulus seyt: my is de croone triomphant

 

bewaert, & al die haer niet en refuseren;

 

maer elck moet tot deynde persevereren, want:

 

die wilt glorieren // moet persevereren.

Coronat opus.