Refereinen en andere gedichten uit de XVIe eeuw
(1879-1881)–Jan de Bruyne–
Auteursrechtvrijverzameld en afgeschreven door Jan de Bruyne
[pagina 203]
| |
- LXXXVI - [Ghy, erm gierich mens, die dongeloof aencleeft]aant.
Ghy, erm gierich mens, die dongeloof aencleeft,
wiens herte doert sorgen van gebreke beeft,
die geen ruste inwendich, midts tgierich spueren
des goedts becueren,
hier en moecht vinden, maer tot een slaeff u begeeft,
vanden schat des boosheyts, daer ghy doch maer en leeft,
eenen cleynen tyt in veel dolueren,
fiet, u sal gebueren
een haestich sterven: wetty dit niet van vueren,
eer ghy de weirelt volcht, met haer lusten swaer,
daer ghy siele & lyff om gaet avontueren?
Weer recht oft onrecht is, ghy slypet al naer:
vreck van leven, inwendich & openbaer.
Hoe pyndy tgemack van u goet te dervene!
Ter redelycker wys sorgen, prys ick wel; maer
sot is hy, die hier erm leeft om ryc te stervene.
| |
[pagina 204]
| |
Ghy leeft hier ermhertich, nau en dorffdy eten,
& denckt om geen sterven, in ryckeyt geseten.
Ghy sorgt voer gebreck: siet, u ryc en mach niet staen;
het vergaet seer saen.
Hoe moechdy dan uwen naesten ontwegen, ontmeten?
En den ermen buyck hebdy altemael vergeten!
Die selve mate suldy van Godt ontsaen;
menigen droeven traen
suldy namaels beschreyen; u valschen waen,
uwen schat sal verdwynen gelyc een blomme;
dat ghy verspaert hebt, sal u int leste afgaen.
Wat helpt doch den dooyen een groote somme?
schoudt uwen afgodt, want den wech gaet cromme;
ghy en wordt niet misnaemt, dits trecht; seyt daeromme:
sot is hy, die hier erm leeft om ryc te stervene.
Hoe moechdy in u dwaesheyt soo verstyven?
Condy tvier des giericheyts niet verdryven,
dwelck u erm doet leven om veel te vergeiren?
Het doet seer deiren
u hert, dwelck versot is opde roode schyven;
die ghy niet en gebruyckt, sullen hier blyven,
| |
[pagina 205]
| |
ander sullent verteiren.
Hoe moechdy u aldus vreck, gierich geneiren,
& laet u erm siele liggen wroeten int sant,
die gestelt sal worden byden oncleiren!
Wat leven leydy? Merckt toch u misverstant:
diendy niet den Mamon, een knecht vanden vyant?
Den cnagenden worm staet u te verwervene.
Blyfdy even wreckgierich, tis dwaesheyt; want
sot is hy, die hier erm leeft om ryc te stervene.
prinche.
Waer wildy met de sake in deynde henen?
Wat onschult wetty? Godts woort is verschenen:
dit hebdy gans verlaten & stelt uwen moet
opt verganckelyc goet.
Als ghy van sieckten hier sult liggen stenen,
& hope van leven is al verdwenen,
wat sal u uwen rycdom baten & tsparen vroet?
Siet wel wat ghy doet:
sterfdy dan in eenen onsaligen voerspoet,
| |
[pagina 206]
| |
hebbende den boosen schadt voer eenen godt,
dan heeft u de giericheyt onder haren voet.
Wordy met recht niet wel genaemt eenen sot?
En hebbet qualyc gebruyckt tegen Godts gebodt?
Wat sekers staet u doch hier te ervene
dan dwoort datter is volgende hier mede tslot?
Sot is hy, die erm leeft om ryc te stervene.
Gestelt op de Goubloem feeste |
|