Het Antwerps Liedboek. 87 Melodieën uit 'Een schoon liedekens-boeck' van 1544. Deel 1. Liederen
(1975)–Anoniem Antwerps liedboek–
Auteursrechtelijk beschermd
[pagina 48]
| |
Een oudt liedeken1.
Ga naar margenoot+ Een ridder ende een meysken jonck
Op een rivierken dat si saten.
Ga naar margenoot+ Hoe stille dat dat water stont
Als si van goeder minnen spraken.
2.
‘Och segt mi, stout ridder goet,
Ick soude gaerne weten
Waer om dat dat water stille stoet,
Als wi van goeder minnen spreken.’
3.
‘Dat dat water stille staet
dat en gheeft mi gheen vreemde:
Ick hebbe so menighe jonghe maecht
Ghebrocht in groot allende.’
4.
‘Hebdy so menighe maecht
Ghebrocht in swaer allende?
Wacht u, stout ruyter goet,
dat u God niet en scheynde.’
5.
‘Ic weet noch een so hooghen berch,
Booven alle berghen is hi hooghe;
Die sal ick noch in dale brenghen,
daer om ist dat ick pooghe.’
| |
[pagina 49]
| |
6.
‘Suldy mijns vaders hooghen berch
Tot eenen dale brenghen?
Ick sage u liever, stout ridder goet,
Bi uwer keelen hanghen.
7.
Ick hadde noch veel liever
dat u die sonne bescheene
Al onder thol van uwen voeten,
den bast al om u kele.’
8.
Dat meysken was jonc ende daer toe dom,
Si en wist niet wat si seyde.
doen si in haers liefs armen lach,
doen was den berch ter neder.
9.
‘Och segt mi, meysken jonck,
Is nu mijn kele gehanghen?
Nu is dijns vaders hooghen berch
In eenen dale ghevallen.’
10.
Och doen dat meysken ghewaer wert
dat si een kindeken bleef draghen,
Si ghinck al voor den ridder staen,
Si badt hem om ghenade.
11.
‘Ghenade, stout ridder fijn,
Ghenade van mijnen lijve!
Ic was een goet maechdekijn,Ga naar margenoot+
Nu moet ic met uwen kinde blijven.’
12.
‘Wat ghenade soude ic u doen?
Ghi en zijt gheen keyserinne.
Ick mocht u mijnen schiltknecht gheven,
Cost ic hem daer toe ghebringhen.’
13.
‘Uwen schiltknecht en wil ic niet,
Hi is mi veel te snode.
Al is mijnen hooghen berch ter neder,
Ic hope ghi sult hem noch wel hoghen.’
14.
Dat meysken hadde eenen broeder stout,
Hi was haer goet ende ghetrouwe,
Als hi haer dede wel int aenschijn,
Hi beweest haer al metter trouwen.
15.
Och doen die broeder gheware wert
Dat si een kindeken bleef draghen,
Hi ghinc al voor den ridder staen,
Hi badt hem mede te grave.
| |
[pagina 50]
| |
16.
‘God groet u,’ seyt hi, ‘stout ridder vrij,
Stout ridder vrij van waerden,
Och, die met uwen kinde was bevaen
Die leyt hier doot opter aerden.’
17.
‘Och is si doot, dat schoone wijf,
Die overschoone die ick beminne?
So en sal ic nu noch nemmermeer
Mijn grauwe ros berijden.
18.
Haelt mijn spere ende ooc mijn schilde,
Mijn swaert al aen mijn side.
Ic wil gaen rijden selver daer,
Men vint der valscher boden so vele.’
19.
Och doen hi op der heyden quam,
Hi hoorde die clocken clincken.
Hi hoorde wel aen der clocken clanck
Dat si inder aerden moeste sincken.
20.
Hi nam sinen bruynen schilt,
Hi worp hem op der aerden.
‘Ligget daer, ligget daer, goet bruyne schilt,
Van mi en suldi niet ghedragen werden.’
21.
‘Heft op uwen bruynen schilt,
Hanghet hem onder u side.
Ga naar margenoot+ Al waer u vader ende moeder doot,
Den rouwe moet ghi lijden.’
22.
‘Al waer mijn vader ende moeder doot
Ende mijn broeders alle vijve,
So en waer den rouwe niet also groot
Als hi is van desen schoonen wijve.’
23.
Doen hi op dat kerchof quam,
Hi hoorde die papen singhen.
Hi hoorde wel aen der papen sanck
Dat si vigelie songhen.
24.
Doen hi inder kercken tradt,
Hi sach zijn liefken staen in bare,
Ghedect met een baren cleede,
Recht oft si nu oock doot ware.
25.
Hi hief op dat baren cleet,
Hi sach haer cleyn vingerken roeren.
Och, doen so loech haer roode monde,
Doen si den ridder voelde.
| |
[pagina 51]
| |
26.
‘Staet op, staet op, mijn soete lief,
Wel over schoone jonckfrouwe!
Ic en sal u nu noch nemmermeer
Doen so groten ontrouwe.
27.
Wel op, wel op, mijn soete lief,
Mijn overschoone jonckfrouwe!
Al waert mijn vader ende moeder leet,
So sal ick u tot eenen wijve trouwen.
28.
Al waert mijn vader ende moeder leet
Ende mijn broeders alle vijve,
So sal ick u houden voor mijn bruyt
Ende trouwen u tot eenen wijve.’
|
