Het Antwerps Liedboek. 87 Melodieën uit 'Een schoon liedekens-boeck' van 1544. Deel 1. Liederen

[p. 46]

22
Een aerdich vrouken hevet mi bedroghen
Een nieu liedeken
AL XLIV melodie tekst

Een nieu liedeken

⁺ Een aerdich vrouken hevet mi bedroghen,
Daer ick was op verghect.
Haer smeekende woorden zijn al ghelogen,
Dat vinde ick nu perfect.
Si is mi te doortrect,
Te dubbel ook van gronde.
Dus keer ick mi van haer.
Si payter so vele met haren valschen monde,
Ic en achtse niet een haer.

+ fol.24v

[p. 47]

2.

 

Ghesellekens, wilt u sinnekens keeren

 

Van sulc een schoon samblant,

 

Want si soude u plucken ende minnen leren,⁺

 

Ja, hebdijt wel in die hant,

 

daer af heb ik tverstant.

 

Gaet Vlaender gheheel int ronde:

 

Gheen wijf so wanckelbaer!

 

Si paeyter so vele met haren valschen etc.

Nu laet ic een ander zijn goet verquisten,
Van sinnen jonck ende mal.
Want met hare subtijle listen
Si u wel plucken sal
Ende vallen eenen val,
dat is daghelicx bevonden,
Met u hier ende daer!
Si paeiter so vele met haren valschen monde, etc.

Wat heb ic met u al tijts versleten,
Ic en spaerde gelt noch goet.
Nu ben ic vanden back ghebeten,
Ic en weet niet wiet mi doet.
des ic mi bedwingen moet
Het aenhoren van haer faconde,
dat segghe ic u voorwaer!
Si paeiter so vele met haren valschen monde, etc.

Joncfrou, ghi laet nu voor u knielen,
Ghi zijt daer voor bekent.
In een osbaer met drie wielen
Suldy nemen u endt.
Ick triumphere gent,
Als ghi tot allen stonden
Sult sitten int liden swaer.
Si paeiter so vele met haren valschen monde, etc.

Adieu, ghi waert eens mijn princesse
Met uwen soeten rel.
Adieu, ghi paeyter vive oft sesse,
Toeft Hanneken ende Wuyten wel.
Adieu, mijn dubbel vel!
doen ic met haer triumpheerde
en vraechde ic niewers na.
Si paeiter so vele met haren valschen monde, etc.

+ fol.25r