Belgisch museum voor de Nederduitsche tael- en letterkunde en de geschiedenis des vaderlands. Deel 7

[p. 439]

Menestrels van graef Lodewyk van Male.
(a^o 1356.)

Wy Lodewijc etc. doen te wetene allen lieden, dat, als wy, in tiden verleden, hebben ghegeven Hanneken Pipen ende Loenken Pipen onsen menestrels, over den goeden dienst die zy ons ghedaen hadden, ende hoopten dat zy ons noch doen zouden, te haren live¹ eene makelardie van den Rijnschen winen in onse stede van den Damme, die tonser ghiften toe behoort, elken de heilt² van den proffite derof te heffene, ende ons de vors. Hannekin ende Loenkin de vors. makelardie, ter begherten van ons, om zekere zaken, wedere up ghedreghen ende ghegheven hebben, quite ghescolden, ende de letteren die zy van ons derof hadden te nieute ghedaen, wy, die begheeren hemlieden in de stede van dien³ te versiene, hebben ghegheven ende gheven den vors. Hannekin Pipen, in de stede van sinen deele van der vors. makelardie, xxx parisise sjaers vlaendersche munte, elx jaers, als langhe als hi leven zal, te heffene ende te rekene up de pachte ende goet van der baillien ende van der meyerien in de nieuwe keure van Watervliet, de welke ons toe behoeren, deene heilt telken helichs Kerstsdaghe, ende dander heilt telken sinte Jansdaghe mitszomers⁴, ende zal zijn deerste payement

1 Hun leven lang.

2 Helft.

3 In stede, in vervanging dier gifte.

4 Te middenzomer.

[p. 440]

van der heilt van der vors. rente in shelichs Kerstsdaghe eerst commende, ende dandere te sinte Jhans daghe mitszomers, daer naer naest volghende, en also voort van jare te jare, ende van terminen te terminen, heffende... xxx parisise tsjaers, ten live van den vors. Hannekinne ende nomeer¹. Ombieden ende bevelen allen onsen pachters ende handelers van der baillien ende meyerien vors., diet nu zijn ende hier naer wezen zullen, dat zy van nu voort den vors. Hanekine gheven ende ghelden de vors. rente elx jaers, ten daghen vors., zonder enich wedersegghen of ander bevel derof te hebbene van ons, of van anderen, nemende van den vors. Hannekine letteren van quitatien telken payemente, mits den welken overghevende tonswaert zy hem quiten zullen jeghen ons, de welke ghifte wy willen den vors. Hannekine wel ende loyalike ghehouden sijn van ons, ende van onsen naercommers, zonder eenich verbreken, in der manieren dat vors. es, bi der orconde van desen lettren, etc. Ghegheven te Brugghe den xxiiij dagh van hoymaend int jaer LVI.

Bi mijn heere den grave, met monde, present den heere van Dudzele ende Jhan den clerc.

(Get.) H. VLIEDERBEKE.

Afgeschreven uit het codex der Decreten van den grave Lodewijc van Vlaenderen, fol. 138 verso, zynde het originele register gehouden door de cancellary van Vlaenderen, en berustende in het provinciael Archief van Oost-Vlaenderen, te Gent.

J.F. WILLEMS.

1 Niet meerder.