Belgisch museum voor de Nederduitsche tael- en letterkunde en de geschiedenis des vaderlands. Deel 7

[p. 104]

Jaerwedden der Brusselsche ambtenaren en bedienden, in 1359.

Allen den ghenen, die dese jegenwordege letteren zien selen ende hoiren lesen, Scepenen, Rentmeestere, ende Raid, Dekene ende Achte van der gulden, ende alle de poirteren gemeinlec van der stad van Bruessele, saluut met kennessen der waerheit. Cont zy allen, want wy aenzien den last ende den commer van der voirs. stad, als van der lijftocht, die zy sculdich es jaerlecx vele persoenen, ende van andren scouden¹ die de voirs. stad oic sculdich es, als van den vesten van der stad; aenzien oic den cost de stad jaerlecx mede te houdene, ende wy begheeren dat de stad in eeren ende in state blive, Soe hebben wy gesett, gemaict ende geordeneert, eendrachtichlijke, die poente voirtane meer te houdene die hier nae bescreven sijn, dats te wetene:

In den iersten hebben wy geset ende geordineert dat

1 Scouden, schulden.

[p. 105]

de Scepenen ende twee Rentmeesters van der stad, elc van hen, hebben sal een paer cleedre tsjaers, ende daer toe sal men hen gheven twee lange lakene, uutgescheiden¹ rootscarlaken, perscarlaken, ende gheleght laken; ende die ghelijke selen hebben van den twee guldekenen ende van den Achten, elc een paer cleedre.

Item drie der stad Clerke selen hebben, elc van hen, een paer cleedre ende twee ponde grote tsjaers assijzegelds van der stad, ende haere brievegeldt, die zy den lieden scriven, met selken vorwaerden dat zy den pays-makeren dienen selen, ende dat den Scepenen toebehoirt.

Item mogen de Rentmeesteren van der stad gheven haren clerk drie pond groote assijsegelds, ende een paer cleedere, met selker voorwaerden, dat hy van niemene bate zoeken en sal, noch nemen, nochte niemen van sinen wegen op sinen dienst.

Item de Surgijn van sente Jans gasthuyse sal hebben tsjaers een paer cleedere ende vijf en twintich schelling grote assizegelds, hy ende sijn knape; ende van den gasthuyse van sente Jans oic vijf en twintich scellinge grote vors. hy ende sijn knape. Ende meester Claes sal hebben een paer cleedere tsjaers.

Voirt selen hebben der stad knapen, elc van hen, twee pond grote assizegelds ende een paer cleedere, met selker vorwairden dat zy en gheene bate en selen zoeken noch nemen, noch niemand van haren wegen uter stad goede te treckene, ende voirt van dat die Scepenen op de merte comen, selen zy by hen bliven, ende op de marct, oft elder, waer zy sijn, tote ander tijt dat die Scepenen van der marct scheiden, oft van elder

1 Uutgescheiden, uitgezonderd.

[p. 106]

dair zy sijn. Ende die knapen en selen niet van hen gaen, omme de heerlicheit van der stad. Ende waert dat zy des niet en daden, soe moghen zy twee Scepenen die knapen afdoen van haren dienste, sonder meer gevolchs van haren gesellen.

Item meester Phaes ende Willem de Mets selen hebben, elc van hen, een paer cleedre tsjaers, omme dat zy beide meerrers¹ sijn van der stad.

Item meester Jan, van sente Goedelen, sal hebben een paer cleedere tjaers.

Item de meester, die de fonteynen achterwaert², sal hebben een paer cleedere ende thiene schellinge groote tsjaers.

Item de wachtre van sente Claeus een paer cleedere tsjaers, ende sijn maentgeldt.

Item Willem Vanden Spiegele, die tbroot weeght, twintich scellinge ende thiene penninge grote tsjaers, ende Amelrike, den pape van den selven, acht en twintich scellinge ende acht penninge grote tsjaers; ende haren knape vijf scellinge grote tsjaers.

Item Denijs Blanckaerd, van den wijnen te segelen, thiene scellinge grote tsjaers.

Item sal men gheven, van der stad wegen, den costere van sente Goedelen derdalven scelling grote tsjaers.

Item den costre van senter Claes mach men gheven, van der coepclocken te ludene, vijf scellinge grote tsjaers.

1 Meerrers, vermeerderaers, die de stad voordeelig zyn geweest.

2 Achterwaert, gade slaet. Te Gent noemt men een baker eer achterwaertster.

[p. 107]

Item den amman van Bruessel, van dat hy de assijze indoet, thien scellinge grote tsjaers.

Item sinen knape, die de geboden doet, acht scellinge ende drie penninge grote tsjaers, ende noch thiene scellinge grote tsjaers van den paysmakeren wegen.

Item den hangedief vijf scellinge grote tsjaers.

Item mier vrouwen doirwaerdere van Brabant zessdalven scelling grote tsjaers.

Item hen tween die tghescutte ende de bogen van der stad achterwaren, elken van hen, vive en twintich scellinge grote.

Item den scutteren, te harer gulden ende te harer maeltijt, veertich scellinge grote tsjaers.

Item mach men gheven, te lone van den laken groten te ontfane, thiene mottoene tsjaers.

Item soe en sal de stad engheenen meester van den timmerlieden loenen, noch van den steenbickeleren, en ware als de stad te timmeren ende te metselne hadde, soe mach men den meesters van den timmerlieden ende van den steenbickeleren gheven een paer cleedere tsjaers, alsoe lange alse de stad werken doet, ende haren dagelijcschen loen, alse zy wercken, met zelker conditien dat alle daffal van cortelinghen, van houte, ende spaendre ende outwerck, ende oic alle dwelfhout ende stellinge der stad bliven selen, ende engeen van hen beyden en sal mogen nemen voirlijf, inne geenre voeghen, noch oic om iemend te werke te settene. Ende alle tgoet dat die twee onderhanden hebben selen van der stad, dat selen zy wel verhueden ende bewaren, gelijc zy sculdich sijn te doene. Ende engeen van hen sal mogen taswerck nemen dat der stad toehoirt, op haren dienst. Item soe en sal die stad enghenen wisselare loonen, om den wissel

[p. 108]

van der stad te houdene, noch niemen van haren wegen.

Item sal men een boeck maken, van der stad wegen, ende daer inne sal men setten hoe vele de stad tsjaers erfelic heft te renten, ende oic lijftochts, ende van wien ment hout. Oic sal men dair inne zetten hoe vele de stad weder sculdich es tsjaers erfelec, ende oic de lijftochte, ende wien ment sculdich es.

Item selen de Rentmeesteren alle maenden rekenen op den meerte¹ voire de Scepenen ende voire de goede liede van der stad, soe datter mach comen wie dat wilt, die van der stad es, omme te wetene alle maende hoe vele de stad tachter es ofte te voren. Ende dus selen twaelf rekeninghen int jaer sijn, ende die sal men bringhen al op eene rekeninghe, ten eynde van den jare; ende hier af selen die Scepenen een boeck hebben, ende die rentmeesters oic een boeck.

Item soe wie Scepene wert te Bruessel oft guldeken, Rentmeester van der stad, ofte Achte van der gulden, die sal zekeren ende geloven op den eedt, dien hi dede, doen hy scepen wert, oft guldeken, of rentmeester van der stad, ofte achte van der gulden, alle dese pointe, die in desen chartre bescreven sijn, wettelec ende wael te houdene. Ende ware eenich van den Scepenen, Guldekenen, Rentmeesters ofte Achte, die des niet zekeren en woude, noch geloven, die soude die Amman van Bruessel alselc hebben, met hem ende met sinen goede, dat hy die poente vors. zekeren ende geloven soude te houdene, ghelijc zy voire gescreven sijn.

Ende om dat wi willen ende begheren dat alle dese voirs. poente vaste ende gestade gehouden bliven, soe

1 Op de merkt?

[p. 109]

hebben wy onsen gemeynen seghel aen dese letteren gehangen, in kennesse der waerheit. Gedaen int jaer ons Heren dusentich drie hondert vijftich ende negene.

Overgeschreven uit de Historia diplomatica ducum Brabantiae, van A-Thymo, handschrift op perkament van de eerste helft der XV^e eeuw, tom. II, folio 211, verso.

J.F. WILLEMS.