Brabbeling (1614)

Studie-uitgave met inleiding, annotaties en commentaar

Het eerste Schock van de Rommelsoo.⁺

Ro.1.1aant.

Noe plante den wijngaert soet,
En bespoeyde de stam met bloet,
Van Leeuw, van Lam, van Aep, van Swijn,
De vier complexien van de Wijn:
Leeuwen wijn is trots en woedich:
Lammekens wijn is gul en goedich:
Verckens wijn doet storten en spillen:
Apen wijn maeckt vreemde grillen.

+ p. 104

Ro.1.2aant.

Eer sal een Kat broen eyeren van Hennen,
Eer sal de waghen de Paerden mennen,
Eer sal het speck zijn vet verliesen,
Dan ick een ander Lief sal kiesen.

Eer sal de Son opgaen int Westen,

En Koeyen in boomen maken nesten,
En hout en steen sal hoesten en fniesen,
Dan ick een ander Lief sal kiesen.

Eer sal een Visschers Kater vergaen,

Van hongher sal sterven een Molenaers Haen,
En Schapen draghen gulden vliesen,
Dan ick een ander Lief sal kiesen.

Als de Schepen zeylen teghen wint,

Als de Vader jongher is dan zijn kint,
En in Julio een voet dick sal vriesen,
Dan sal ick een ander Liefken kiesen.

Ro.1.3
Aen Jan van Hout.aant.

Claes van Hout can loopen noch springhen:
Frans van Hout can lesen noch schryven:
Marten van Hout can segghen noch singhen:
Barber van Hout can wasschen noch styven:
Dan mijn vrient van Hout can alle vreucht bedryven.

Ro.1.4⁺
Aen Lambert.aant.

Hebt ghy een quaet wijf, die ghy moet achten?
Hebt ghy kinderen die u om eten quellen?
Hebt ghy een Meester daer ghy op moet wachten?
Hebt ghy een pleyt op Articulen te stellen?
Hebt ghy te schryven of ghelt te tellen?
Of wil het ledich gaen u niet toelaten?
Een uurken by u vrient te comen praten?

+ p. 105

Ro.1.5
Aen den selven.aant.

Ghy zijt niet lam in dansen en springhen,
Ghy zijt niet lam in t'loopen int gaen,
Ghy zijt niet lam in worstelen en wringhen,
Ghy zijt niet lam in hippelen of staen,
Ghy zijt niet lam als ghy rijt op de baen:
De reden waerom ick u Lammert moet noemen,
Is, dat ghy lam zijt, by u lamme maet te comen.

Ro.1.6
Noch aen hem.aant.

Ghy zijt niet lam, als ghy nae u Liefken spoet,
Als ghy danst soo en hebt ghy gheen lamme voet,
Op de marckt oock gaet ghy recht als een brammert:
Dan my te besoecken zijt ghy een rechte lammert.

Ro.1.7aant.

Deur hopende hoop comt wanhoop my beneven,
De doot dunckt my een gherustich leven,
Mijn self plaech ick met gheneuchte siet,
En door mijn gheneuchte lijd ick verdriet,
Dat door de pijn die my gheneucht kan gheven.
Deur hopende hoop.

De hatelijcke liefde heeft onmaet verdreven,

deur maticheyt moet my ongheneucht aencleven:
Want met hetten het my vercoelinghe biet,
deur hopende hoop.

Het kint dat zijn Moeder brenght in sneven,

Verbint zijn ooghen om my te sien beven,
Het loopt wech en can van my wijcken niet,
Blijft in duysternis verholen en verspiet,
Op dat mijn lyden openbaer sy gheschreven.
deur hopende hoop.

Ro.1.[8]⁺aant.

Janneken, mijn Lief, moet ick u een reysken?
Al vraecht ghy, wat? Ghy weet wel wat ick meen,
Een halven daelder gheef ick u proper Meysken.
Janneken, mijn Lief, moet ick u een reysken?
Wilt ghy dan meer, soo moocht ghyt selfs eysschen:
Dan tot mijn begeeren en wilt niet segghen neen.
Janneken, mijn Lief, moet ick u een reysken?
Al vraecht ghy, wat? Ghy weet wel wat ick meen:
Proeven schoon Lief of ghy oock zijt te kleen.

+ p. 106

Ro.1.9aant.

En vraecht niet al te veel,
Maer slaet hant aen den Ploech,
Wy Meyskens wy zijn eel:
En vraecht niet al te veel
Sonder twist of crackeel,
Soo doet nae u ghevoech.
En vraecht niet al te veel,
Maer slaet hant aenden ploech:
Ben ick dan te cleyn, soo maeckt mijn groot ghenoech.

Ro.1.10
Grafschrift.aant.

Hier onder leyt,
Een jonghe Meyt,
Die plach te zijn,
Vrolijck van praet,
Eerlijck van daet,
Schoon van aenschijn.

Met hare vreucht,

Heeft sy verheucht,
Groot ende cleyn:
Maer haer verdriet,
Claechde sy niet,
Dan God alleyn.

Den wech ter doot,

Deur lyden groot,
Is sy ghetreden:
Met Lazaro bloot,
In Abrahams schoot,
Rust sy in vreden. Amen.

Ro.1.11⁺aant.

Al zijt ghy op my nu seer ghestoort,
U gramschap sal ick in't soet ghebruycken,
Met u heb ick veel vreuchts orboort.
Al zijt ghy op my nu seer ghestoort:
Dan isser een ander die u herte becoort,
Wilt hem vry in u armkens luycken.
Al zijt ghy op my nu seer ghestoort,
U gramschap sal ick in't soet ghebruycken:
Men can uyt Gal wel Honich suycken.

+ p. 107

Ro.1.12aant.

Waer is schoon Lief den tijt voorleden,
Die ons dede hanteren solaes en vreucht?
Als wy t'samen spraken met lieflijcke reden?
Waer is schoon Lief den tijt voorleden,
Die u hart en t'mijn stelde in vreden?
Maer scheyen van u, maeckt onghenuecht.
Waer is schoon Lief den tijt voorleden
Die ons dede hanteren solaes en vreucht?
Peynst'er om Lief, als ghy niet slapen meucht.

Ro.1.13aant.

Pieter meent ghy te wesen eel,
Om dat ghy draecht Zijd en Fluweel?
Of om dat ghy hebt soo fraeyen van?
Neen: maer waert ghy eel van gheslacht,
Of uytghesondert deur deucht of cracht,
Soo waert ghy eerst een Edelman.

Ro.1.14aant.

Alderliefste ghy gheeft my bloemen en blaen,
My, die de vrucht begeert te plocken:
Wat sal ick hier anders uyt verstaen,
Dan dat ghy niet wilt dan boerten en jocken?

Ro.1.15aant.

Pluyckt eerst de bladen en bloemen soet,
De vruchte moet noch wat zijn ghespaert,
Laetse bet rijpen soo wortse goet:
Versmaedt ghy t'cleyn, soo zijt ghy t'groot niet waert.

Ro.1.16⁺
Aen Arent.aant.

Heb ick gheen gheloof, ghy averechte Loth?
Om dat ick niet gheloof, dat ghy ghelooft in God?
Nochtans gheloof ick dat ghy t'Vaderlant verliet,
Om't gheloof, en ghy kent u Pater Noster niet.

Ick gheloof dat ghy zijt een Calf, fijn ist,

Ick gheloof dat ghy den Paus hout voor Antechrist,
Ick gheloof dat ghy haet d'Inquisity van Spangen,
En cortwyligen Raet zijt, by den Prince van Orangen.

Ick gheloof dat ghy een Lansknecht zijt by de wijn,

Ick gheloof dat ghy een Ruyter zijt achter t'gordijn,
Ick gheloof dat u wijf u maeckte rijck,
Ick gheloof dat ghy Commissaris zijt van den dijck.

Ick gheloof dat ghy zijt een Gans of Duyf,

Een Uyl of Kievit met een groote kuyf,
Of een Coeckoeck die de Nachtegael wilt verdoven:
Dan dat ghy een Arent zijt, en kan ick niet ghelooven.

+ p. 108

Ro.1.17aant.

Die u vrijt moocht ghy niet lyen,
En die ghy begeert, comt u niet vryen:
Ghy mochtet u daghen niet beter passen,
Om tusschen twee stoelen te raken inder assen.

Ro.1.18aant.

Uyt u sinne, seght ghy, sout ghy worden wel,
Als ghy siet een pufpuntighe slordebel:
dan op dat u deur sulcx gheen leet gheschiet,
Soo rade ick u, kijckt inde spieghel niet.

Ro.1.19aant.

Als ick t'savonts voor by u huys loop hoepen,
daer ghy staet tusschen twee steenen stoepen,
En ick van groeten u schenck u deel:
Soo antwoort ghy alle drie even veel.

Ro.1.20aant.

Het eerst dattet aen u wert versocht,
Slaet toe de coop u Lief op trouwen,
Tis beter berouwen en vercocht:
dan behouwen en berouwen.

Ro.1.21⁺aant.

Met water dorschen, eyeren schillen,
Met neten craken, Vorsschen villen,
En met Janneken een Jaer te vryen,
Sult ghy even veel bedyen.

+ p. 109

Ro.1.22aant.

Ghy zijt soo schoon en soet van wesen,
Dat ick voor u niet bid den Heer:
Dan dat hy u slechs behout in desen:
Want schoonder maeckt hy u nemmermeer.

Ro.1.23aant.

Men mach my wel elwaerts noon te gast,
Om met wijn en bier wel te tracteren:
Maer nerghens is beter op mijn ghepast,
Dan daer ick met u mach triumpheren.

Ro.1.24aant.

Rijck van have, flucx van leden,
Vrolijck van praet, soet van seden,
Schoon van aensicht, wijs van sinnen,
Wat droes en soude u niet beminnen?

Ro.1.25aant.

Ghy hebt soo dick by u eedt verclaert,
Dat ghy gheen ander en sout beminnen,
Dan ghy reeckende doe al sonder Waert,
Ghy sult u efter wel bet versinnen.

Ro.1.26aant.

Truy beval haer Soon dat hy een Vryster, van haer verspiet,
Soude gaen vryen, wiens naem hy alleenlijck wist:
Maer om datter meer als een Hont lodder hiet,
Heeft hij hier door de recht-schuldighe ghemist,
En sprekende van liefde aen die op sulcx niet had gegist,
Sloech hem soetelijck, segghende, ick ken des Vryers gront:
Och Lief ick meent seecker sonder arch of list,
Bemercke hier oock aen, dat u hert mijn Liefde jont:
Elcke slach is my soo soet, als een suyckerkoeck in mijn mont.

Ro.1.27⁺aant.

Seecker datmen u voor wijs siet an,
En datmen u Loeris acht voor een Man,
Danckt dat u baert, die u soo can vercieren:
Maer Loeris dat ick u acht voor een loen,
Voor een geck, voor een dwaes, voor een mal capproen,
Danckt dat Loeris u eyghen manieren.

+ p. 110

Ro.1.28aant.

Het sweeren is by u alsoo ghemeyn,
Ghy sweert om een dingh t'sy groot of cleyn,
Ghy sweert wel als u bijt een Vloo,
Ghy sweert wel om een haverstroo,
Ghy sout om een beulingh wel sweeren siet,
Dat het Vercken gortich is, en deuch niet:
Maer al swoert ghy by den Duyvel of onsen Heer,
Soo sal ick u ghelooven doch nimmermeer.

Ro.1.29aant.

Sijt ghegroet, mijn Liefste boven alle Vrouwen:
Sijt ghegroet, de schoonste in swerelts rontheyt:
Sijt ghegroet, die ick met vreuchden moet aenschouwen:
Sijt ghegroet, de Liefste boven alle Vrouwen:
Sijt ghegroet, op wien ick mijn ghepeyns moet bouwen:
Sijt ghegroet, op wien mijn levens gront leyt:
Sijt ghegroet, mijn Liefste boven alle Vrouwen:
Sijt ghegroet de schoonste in swerelts rontheyt:
God gheve u goeden dach en goede ghesontheyt.

Ro.1.30aant.

Stryen,, en schansen,, soo doen de Hansen,
Die cryghen leeren:
Vrijen,, en dansen,, om Roose cransen,
Die liefd hanteren.

Ro.1.31aant.

Hy is een dwaes, jae vertwyfelt sot,
Die Venus kint acht voor een God:
Want God is goet, zijn goetheyt wy mercken,, wel,
Cupido is een schelm, t'blijckt aen zijn wercken,, fel.

Ro.1.32⁺aant.

Groote spoet,, is selden goet,, dus loopt niet snel:
Maer gaet traech,, en staech,, ghy sulter comen wel:
Dan wilt ghy vlieghen, ghelijck doet u ghedacht,
Ghy deed dees reyse wel op eender nacht:
Maer al ginght ghy in u droom te Romen,
Soo sult ghy even wijs wederom comen.

+ p. 111

Ro.1.33aant.

Quaet is de Wolf, die de Schapen quelt,
Quaet is de reghen opt rijpe Coren,
Quaet is de wint die de boomen velt,
Quaet is voor mijn, mijn Liefkens toren.

Ro.1.34aant.

Soet is de reghen opt ghesaeyde vlas,
Soet zijn de bladen den ghespaenden Geyt,
Soet is de Koeyen het groene gras,
Soet is voor my een jonghe Meyt.

Ro.1.35aant.

Als ghy doet een eerlijcke daet,
Al ist met moeyten en arbeyt groot,
De arbeyt door den rust vergaet,
Ende de eere blijft oock nae de doot.

Maer soo ghy doet een schandelijck stick,

Al is daer wellust in begrepen,
Die lust sal vergaen met een click,
En eeuwich sal u de schant nae slepen.

Ro.1.36aant.

Meyskens vande courtosy,
Weest hier vry,
Als u de Jonghers doen Honneur,
Nijcht, en seght nae d'oude sleur,
Grammercy.

Ro.1.37aant.

Meysken door der minnen dwanck,
Ben ick cranck,
Wilde ghy de sieckt ghenesen,
Ick soude segghen met vrolijck wesen,
Grooten danck.

Ro.1.[38]⁺aant.

Nerghens beter dan in de Kerck is de Paep devoot,
Nerghens beter is de Vryer, dan daer dat hy zijn Lief aenschout,
Nerghens beter ist kint, dan op zijn Moeders schoot,
Nerghens beter is de Vis, dan int water cout,
Nerghens beter is de Voghel, dan int wilde Wout,
Nerghens beter is de Koe, dan int groene gras,
Nerghens beter ist ghelt dan in eyghen tas.

+ p. 112

Ro.1.39aant.

De Werelt wyse op zijn cloeck, vernuftich verstant,
De Rijcke op zijn onghewis, veranderlijck goet,
De stercke op zijn ghewapende borst en hant,
De jonghe op zijn onversochte reuckeloose moet,
Op hooghe mueren, dicke wallen de bloode sot:
Maer de gheloovighe verlaet hem alleen op God.

Ro.1.40aant.

Vreemde Bedelaers te maken Heeren,
Boeven verheven in grooter eeren,
Uyt de lande jaghen den rechten Patriot:
Der rijcken goederen confisceren,
De arme Ghemeente schatten en scheeren
Is der Tyrannen raet, daet en slot:
Een oprechte Overicheyt is een gaef van God.

Ro.1.41aant.

Schepen die wetent valsch oordeel velt,
Coopman die verdurven ware vercoopt voor goet,
Priester die gierich is int vergaren van ghelt,
Vuyle Hoere die sich schoon voort doet,
En solliciteren in groote Heeren hoven,
En sal hem niemant seer beloven.

Ro.1.42
Op de Bruyloft van Willem A. en Trijn E.aant.

Gheluck Maghet van leden onbevleckt,
Gheluck Vryster eertijts van vele bemint,
Gheluck Bruyt met cranse van eeren ghedeckt,
Gheluck Vrouwe van de schoonste diemen vint,
God make u Moeder binnen Jaers van een kint,
Uytdruckende t'beelt van u Bruydegom ghetrou:
Gheluck Maghet, Vryster, Bruyt, ende Vrou.

Ro.1.43⁺
Op de Bruyloft van Diewer en Godefrid.aant.

Noyt schoonder dach, noyt blyder tydinghe,
Noyt meer solaes, noyt meer verblydinghe,
Noyt om droefheyt te staken soo seer bereyt,
Noyt soo gheneghen tot spelen, en singhen,
Noyt jeuckten mijn voeten so om dansen en springen,
Dan nu Diewar (wat schaettet gheseyt)
Van Godes-frede wort ter neer gheleyt.

+ p. 113

Ro.1.44
Op de Bruyloft van Machtelt.aant.

Al sachtges soetges int dansen en springhen,
Al sachtges soetges int spelen en singhen,
Al sachtges soetges int praten en rellen,
Al sachtges soetges int kittelen en tocken,
Al sachtges soetges int boerten en jocken,
Al sachtges soetges int soenen en lellen:
Dan als ghy u Lief, die daer na wacht,, velt,
God geef u gheluck, en toont dan u macht,, helt.

Ro.1.45
Tafelrecht.aant.

T'hooft vande disch sy Waert en Waerdinne,
Verwaende courtosy comt hier niet inne,
Beleeft en goet ronts nae Hollantsche aert,
Niemant sy boven den omgangher met drincken beswaert:
Elck moet sitten daert de Waert sal bevelen:
Ten minsten moet elck een Liedeken quelen:
Het Tafelbort u ghegheven laet voor u legghen,
Spout niet het woort (wat soumen segghen)
Boven de helft van het ghediende en dient niet voort:
Niemant way met zijn hoet, nae de benedijst is ghehoort,
Boven eens sal hem niemant excuseren:
Voort leeft boertich en eerlijck, nae u selfs begeeren,
Gheschieter schimp, trots, smaet, onwil,
Soo moet de wijste hier swyghen stil:
Elck doe voort zijn best, om t'geselschap te vermaken,
Morghen moetmen daer niet ten quaden of kaken:
Dese Wetten gaf Roemer in zijn eyghen huys,
Diese niet en behaghen, die blyve t'huys.

Ro.1.[46]⁺aant.

Ghy wilt niet dan uyt twee de derde ghelooven,
Met u neus sout ghy wel een claphout cloven.

+ p. 114

Ro.1.47aant.

De schoonheyt van u aenschijn claer,
Allegaer,
Loven en prysen over al,
Wie isser die anders segghen sal,
Dan tis waer?

Ro.1.48aant.

T'gheluck dat de Bruyt verwacht,
In't ghedacht,
God gheef dattet u moet ghebeuren,
Van u Liefken sonder treuren,
Nu te nacht.

Ro.1.49aant.

Ghy bewijst by jongh en out,
Deur u cout,
Dat in een schoon lijf, wesen eerbaer,
Is ghelijck een schoon blinckende claer,
Parl int gout.

Ro.1.50aant.

Wist ghy Meysken het secreet,
Dat ick weet,
Om u sieckte te ghenesen,
Ick wed dat ghy terstont sout wesen,
Al ghereet.

Ro.1.51aant.

Meysken hebt ghy u Lief bespiet,
Haest u siet,
Om hem te cryghen aen u lijf,
Dan soo sult ghy zijn een wijf,
Sult ghy niet?

Ro.1.52aant.

Hier mede wert u gheluck Vrou Bruyt,
Alst is uyt,
Men salt u gheven in u hant,
Wilt het lappen (tis gheen schant)
In u huyt.

Ro.1.53⁺aant.

Wil ick u segghen wat ick gis,
Dattet is,
Waerom ghy niet en wort ghevrijt,
Om datmen wel siet dat ghy zijt,
Vleys noch vis.

+ p. 115

Ro.1.54aant.

Al zijn alle Meyskens gay,
Inde May,
Soo wort ghy nochtans ghepresen,
Datter onder haer mach wesen,
Gheen soo fray.

Ro.1.55aant.

Ick verstae niet dese rancken,
Die daer wancken,
Onder de Meyskens onversaecht,
Dat sy (al hoe wel t'haer niet behaecht)
Altijt dancken.

Ro.1.56
H. Lourissz. aen Roemer.aant.

Die haer bemint, mach wenschen om mijn sterven,
Soo hy dan vint, hope om te verwerven,
Hy dientse trou,, maer ick hou

voor ghewis,

Al sturf ick nou,, sy sou

My volghen ris.

Ro.1.57
Roemers antwoort.aant.

T'mocht haer betamen,, voert ghy van deser erven,
Met de Vryers alsamen,, datse dan riep om sterven:
Maer waert ghy doot,, en een ander haer boot,

met lieflijck praten,, trou,

Seecker ick waen,, datse nau een traen

om uwer Liefden laten,, sou.

Ro.1.58aant.

Ick begeer niet meer, al wilde men my gheven,
Al Midas rijckdommen tot mijnder baten,
Dat ghenoech is tot onderhout vant leven,
Daer met wil ick my wel ghenoeghen laten,
Dan houdt maet, behaecht my boven maten.

Ro.1.59⁺aant.

Adieu ghesellen en Dochters mede,
Adieu Amsterdam wel schoone stede,
Adieu, schrijf ick voor eenen tijt,
Adieu ghenuechte en alle jolijt,
Adieu dansen, springhen en snaren gheluyt,
Adieu trommel, trompet en fluyt,
Adieu al dat vreucht mach verwecken,
Adieu van hier soo wil ick trecken.

Adieu praten couten en deviseren

Met Dochters in de doelen gaen spaseren,
Inde Mey of by de Mane schijn;
Adieu o clare Rijnsche wijn,
Adieu posset daer ick of droom,
Adieu stremmelis ende room,
Adieu Sint Anthonis dijck; en Outewael,
Adieu segh ick u altemael.

Adieu Annekens huys en Reguliers Hof,

Adieu Jan ghy sneet die kaes te grof,
Met u ijsbolten en suycker-peeren,
Adieu Haerlem, daermen den Crijch useren,
Adieu Heemste, en dat deur bedwanck,
Adieu Marryken Cuyers met uwen soeten sangh,
Die ghy als een Nachtegael songht onder de linde:
Adieu vaert wel, tot dat ick u weder vinde.

Adieu anderden hout en overveen,

Adieu Jacht-honden groot ende cleen,
Adieu Duynen, daer ick op plach te jaghen,
Adieu Haesen, Conynen, ghy sult niet meer claghen,
Over my: Adieu segh ick voor een half Jaer,
God beter u schade, om draghen swaer,
Teghen dat ick u weder coom visiteren:
Adieu ick hoop de tijt sal keeren.

Adieu hof vol bloemen ghepoot,

Adieu Angelieren en Rooskens root,
Adieu duysent schoon, als mijn Lief playsant,
Die niet hoe langher hoe liever is int herte gheplant
Adieu Lelien wit, en welrieckende Violetten,⁺
Adieu Gout-bloemen, adieu Brunetten,
Adieu Tydelosen, en adieu Aqueleyen:
Adieu, ick wil my gaen vermeyen.

Nu wel aen, adieu en blijft ghesont,

Adieu mijn waertste roder mont,
Adieu mijn Lief in liefden rebel,
Adieu ghy kent u selven wel,
Adieu ick sal u altijt eeren,
Het sy int gaen ofte int keeren,
Adieu mijn hert hebt ghy te pant,
Adieu, want ick treck uyt de lant.

Adieu Cupido met u booch en schichten,

Schiet mijn Lief, of doet mijn Liefde swichten,
Dewijl ick van haer ben absent:
Adieu plaetse daerse my eerst worde bekent,
Adieu huys daer ick haer eerst van minnen aensprack,
Adieu leech erf daer sy seer verschrack,
Doe ick haer subijt quam overvallen:
Adieu mijn Lief ick wil niet meer kallen.

+ p. 116

+ p. 117

Ro.1.60aant.

Het schrale water uyt een coperen vlotele,
Het groene wey uyt een houten schotele,
Het poffe bier uyt tinnen flappers wichtich,
De clare wijn uyt Roemers heel durlichtich:
Men mach t'welige kandeel uyt gulden stopen schincken;
Dan niet beter als Mos uyt een aerden copken drincken.

Ro.1.61
Tot Janus Dousa.aant.

Ghelijcke boom, ghelijcke bladen,
Ghelijcke kaes, ghelijcke maden,
Ghelijcke sinnen, ghelijcke raet,
Ghelijcke merckt, ghelijcke coope,
Ghelijcke vreese, ghelijcke hope,
Ghelijcke naem, ghelijcke daet:
Nu meen ick dat ghy wel verstaet
Waerom u E. Janus is gheheten?
Om dat ghy bemint d'oude en nieuwe Poeten.

Ro.1.62⁺aant.

O rijckdom, Moeder van alle quaet,
Wijf van valsche verradery,
Dochter van sorgh, Suster van haet,
Voester van alle schelmery,
U te hebben dat doet vreesen,
En niet te hebben droevich wesen.

+ p. 118

Ro.1.63aant.

Ysbrant Vryer het ryen is ghedaen,
Opt Water moocht ghy vryen gaen,
Tis anders alst was in voorleden Jaren,
Men plach opt ijs te ryen, en int water te varen:
Wat seght ghy Jan, zijt ghy al wijs?
Gaetmen opt Water, en brant het ijs?

Ro.1.64
H. Lourissz. aen Roemer.aant.

Besiet, t'bediet,, van desen sin:
Maer acht,, die't wracht,, te meer noch min.

Wat staet of handel sullen wy best verkiesen,
Roemer goede vrient, om gheluckich te leven?
T'hof doet veel lieden haer goet en tijt verliesen:
Die Coopmanschap wert met veel moeytens gedreven;
Den Zee-man sietmen door groot perijckel sneven,
Selden by huys en dickwils in doots noot;
Die Lantman oock moet hem met vlijt begheven,
Tot wercken en slaven sal hy hebben t'broot:
De Werelt te besoecken maeckt den rijcken dickwils bloot:
Die veel goets heeft, die staet veel avontueren:
En niet te hebben is argher dan de doot:
D'huwelijcke staet brout oock veel quade curen,
En d'onghehuwede moetet al alleen besueren:
Kinderen te hebben, en gheen te hebben mede,
Doet bey den Mensch dick ongherustich trueren:
De jonckheyt is dom, en onbequaem van seden:
D'ouderdom is quellijck met onghesonde leden,
En vreese des doots of lyden te verwerven:
Dus Roemer Visscher is dit de beste reden,
Of noyt te zijn, of gheboren zijnde, sterven.

Ro.1.65⁺
Roemers antwoort.aant.

Als een bloem de Spinne, is Crates van sinne,

T'leven te ghebruycken:

Maer als Honich de Byen,, Metrodorus t'verblyen,

Daer uyt can suycken.

Wat wech des levens dat ghy wilt wandelen,
Daer vint ghy ghenuechte, ghemack, of eer:
Soo ghy t'Hof wilt volghen, en t'pleyten handelen,
Ghy crijcht een faem, en ghelt dats meer:
Maer u verstant moet ghy hier oeffenen seer,
En by huys te blyven vint ghy een rustich leven:
Soo opt lant te woonen is u begheer,
T'aenschouwen der Ackeren sal u gheneuchte gheven:
Soo ghy inde Coopmanschap wel zijt bedreven,
Of met perijckel over Zee wilt varen,
De winst salt versoeten, diemen daer aen siet cleven:
Sijt ghy buytens lants, wilt u niet beswaren:
Als ghy veel ghelts hebt, men siet u garen,
En hebdy gheen soo darfdy u niet schamen,
Ghy zijt sonder sorch en hebt niet te bewaren:
Hebt ghy een wijf, ghy teelt kinderen t'samen,
En hebt ghy gheen, ghy besorcht gheen Cramen,
Sijt ghy een Vader die zijn kinderen heeft besint,
Sy sullen u beminnen, alst wel sou betamen:
En crijcht ghy gheen kinderen, by u huysvrou bemint,
So en darfdy niet sorgen als een Vader voor zijn kint:
En ghelijck alsmen de jeucht seer schoon siet groeyen,
So sietmen oock verstant inde graeuheyt gheprint:
Dus weet ick niet waerom ghy u gaet moeyen,
Dat ghy gheboren zijnde, tot sterven wilt spoeyen:
Wij moeten ons deel hebben, als d'ander menschen,, al:
Een goet Man de doot, noch vreesen, noch wenschen,, sal.

+ p. 119