Die ridderlycke reyse van heer Lodewijck Vertimans van Bolonien

Dat xiij. Capittel seyt wat lant ende eylanden dat ic ghesien hebbe in Etiopia op die wederkeeringhe van Canonor na Lisseboenen.

IN dier tijt waren ooc sommighe schepen gheladen met coopmanscap, die varen wouden na Poortegael, daer na dat ic groot verlangen hadde, ende het was dier tijt int .vij.ste iaer dat ick van huys ghereyst was, wijf ende kinderen ende mijns vaders lant niet gesien en hadde. Daer ghinck ick tot mijnen hooftman Laurentius, ende begeerde oorlof van hem te bidden, dat hi mi tot huys soude laten reysen, het welcke hi mi oock ghenadelijcken dede. Jc dancte hem van sijnder weldaet ende sijnder ghenaden die hy my ghedaen hadde, ende sadt int schip inden name des almachtighen Gods, ende namen den wech teghen Ethiopia. Op den sesten dach Decembris soo reysden wi ouer een zee, die bi drie duysent mijlen

[fol. 76r]

lanck was, ende quamen tot eenen eylande ghenoemt Mozambich, ende dat is onder den coninc van Portegale. Eer wi aldaer quamen, so saghen wy veel landen ende eylanden, die onder den seluen coninck sijn, in welcken hy goede rustinghe ende ooc veel sloten ghetymmert heeft, bysonder in Mekudi den Conincrijcke, dat die Stadthouder inden gront verbrant hadde, ende in Chilna hielt hi alleen een vasticheyt, ende stercheyt, ende noch een liet hy tymmeren ende bouwen in Monzambich ooc in Zaphala een sterck goet slodt. Jck en behoore met recht nyet voorby te gane de redelijcke ende manlijcke daden des hooftmans Tristrans van Cugua, die daer als hi in Jndia quam ende met grooter voorsinnicheydt in nam die stadt Gogia ende Pati, oock dat stercke eylandt Brana, met oock die eylanden Sacutera, in welcke die Coninck van Poortegael seer goede sloten in heeft. Die orlogen dye daer geweest sijn daer af en scrijue ick niet, want ick daer niet bi gheweest en ben, ick swijghe ooc noch te scriuen van vele schoone landen ende eylanden, daer voor dat wi voorby geuaren sijn op desen wech, onder welcken is een eylant rontom, daer oock gengheber wascht, ende oock veel suyckers, goede vruchten, ende vleesch ghenoech.