Die ridderlycke reyse van heer Lodewijck Vertimans van Bolonien

Dat vierde capittel seyt van nyeuwe tijdinge die twe Persianers brachten in Calcoeten.

OP eenen morghen als ick soude gaen eten met mijnen ghesellen, soo quamen daer in twee Persianers coopluyden wt Canonor, welcke hi in riep om met hem te eten ghelijc lantsluyden behooren, die seyden ende gauen hem antwoorde, Wi hebben weynich lust te eten, want wi brenghen quade tijdinghe. Doen sprack hi tot haer, Wat ist dat ghy voor quade tijdinghe brenght. Also seyden si hem, Daer sijn comen .xij. scepen Poortegaloysers, welc wi met onsen oogen ghesien hebben, daer vraechde mijn gheselle, wat dat voor luyden waren. Doen seyden si, het sijn cristenen, al ghewapent met lichten harnas, si hebben begonst te maken een sterck slodt byder stadt Canonor. Daerom sach mijn gheselle op, ende sprac. O Junus wat volc sijn die Poortegaloysers, daer gaf ick hen antwoorde, En vraget mi niet na dit geslachte, want het sijn al dieuen ende zeeroouers, ick hadde haer lieuer te sien in onsen Machometschen gelooue. Als hi dat hoorde was hem seer qualijc te moede, ende ic was so veel te vroliker in mijn herte.