Die ridderlycke reyse van heer Lodewijck Vertimans van Bolonien

Dat .lxxij. Capittel, vanden eylande Giaua, ende van haer gelooue, leuen, ende wat daer wascht.

NU volghen wi voort aen onsen wech na, ende in vijf dagen sijn wy gecomen in dit eylant Giaua, inder sel-

[fol. 65r]

uen sijn vele conincrijcken, van ongelijcken gelooue, sommige houden afgoderije ghelijc tot Calcoeten, sommighe bidden dye sonne aen, sommighe bidden dye maen aen, ende den deel dye ossen. Ende een ander deel des volcx bidden aen dat eerste dat henluyden des morgens ontmoet. Aldaer vintmen die Smaragdus, dye schoonste die in dye werelt sijn. Ooc vele gouts in sommighe wateren. Ende men maect daer coper een groote menichte wt dat gheberchte, desghelijcken ooc vele wilde sijde. Daer wascht ooc coren oueruloedich vele, ghelijck in onse landen, ende die beste vruchten ghelijck tot Calcoeten, ende men heeft oock aldaer alderley vleesch. Ende ick ghelooue, ghelijc ict oock ghesien ende ghemerct hebbe, dattet ghetroutste volc der werelt is. Aen sommighe plaetsen in die steden, mer niet al om op den lande ende dorpen. Het is volck vander lengden ghelijck wy, wit van verwen, maer sy hebben breede aensichten, groote groenverwige ooghen, die nuese breet ende plat met langen hayre, aldaer is ooc een grote menichte der voghelen, ende al onderscheydelijc den onsen, dan alleen die pauw[en] ende tortelduyuen, ende daer sijn ooc rauen gelijc bi ons sijn, by dit volc houtmen goede gerechticheyt, Si gaen gecleet ongegort met witte cleederen. Den meestendeel van boomwolle ende camelot. Si ghebruycken weynich harnas ende gheweer, want si leuen vredelijc bi malcanderen, dan alleen die op die zee varen, die hebben hantbogen, ende die pilen sijn van cleynen rieten ghemaect, si ghebruycken oock eens deels lange rieten, daer door schieten si fenijnige pijlen, hoe weynich dat si daer mede yemant bloet laten, soo moet hi steruen. Aldaer en heeftmen geen busgeschut, si en laten ooc gheen maken, haer eten is ruggen broot, ende vleesch van Castronen, ende herten maer gheen verckenen. Sy eten oock visch, ende vruchten die si aldaer hebben ,die wtermaten seere goet sijn.