Dat .lxxi. Capit. seyt hoe die scipluyden hen houden, met den scepen tegen dat eylant Giaua.
ALs dat bestelt schip bereyt was met alder nootdruft eten ende drincken, namen wi onsen wech tegen dat schoone eylant Giaua, tot welcke wi gheuaren quamen in vijf dagen altijt int suyden. Die Patroon des scheeps was voor die busse oft compas, met die magneten ghelijc dye schiplieden doen op die zee bi ons, ende een carte, also die schiplieden hebben ter zee, al ghemaect met linien inder lengde. etcetera.
Doen vraechde mijn gheselle die christenen midts dien dat wi ons sterre Tramontana, nae welcke sterre die schipman vaert oft dat schip regeert, Dye voorgenoemde christenen vraechden den Patroon dese dingen,daer thoonde hy ons vier oft vijf sterren, onder die selue was een seyde hi, die was teghen ons Tramontana, ende na die selue sceepte hi, want sijn compas was daer na gemaect, ende niet gelijc onse compassen,
daer na ic ooc considereerde hoe verre wi in die werelt, ende hoe neder wi comen waren, hi seyde ons oock, hoe dat op der ander siden, dese Jnsel oft eylant tegen tsuyden ander volcken ende gheslachten der menschen waren die ooc scheepten na dese vijf voorgenoemde sterren, ende in sommige plaetsen der eylanden en was den dach niet langher dan vier uren, ende daer was die meeste coude die op aerden wesen mochte.
Auteursrechtvrij