Dat .lxix. Cap. seyt van dat Jnsel Monoch, daer die naghelen wasschen.
ALs wi quamen te lande bi desen eylande Monoch, so stonden wi op ons scip, mer dat eylant is veel cleynder dan dat daer die noten wasscen. Dat volc is veel quader ende onuerstandiger, dan int ander eylant Bandan, maer si sijn wat witter van verwen, want tis daer coelder lucht. Dye naghelen wasschen ooc in ander cleyn eylanden ende vlecken inder zee daer bi ghelegen, mer si en zijn die meestendeel niet bewoont met menschen, dan alleen datmen wt desen eylande daer in vaert. Tot dier tijt alsmen dye naghelen pluct. Desen boom die die nagelen draecht, is gestelt ghelijc by ons den palmboom, also breet ende dick, maer die bladeren ghelijc den caneel boom daer ick hier vore af gheseyt hebbe tot Zailon, Als die naghelen rijp sijn, soo spreyden si doecken oft een cleet onder den boom, ende dan met eenen riete slaen si die nagelen af ende vergaderen die te samen Dat aertrijc daer die boomen wasschen, is gelijc sant, hoe wel dattet geen sant en is. Dit lant leyt seer leech, alsoo dat men de sterre Tramontana genoemt niet meer en siet. Als wi dese dinghen gesien hadden, spraken wi tot den Christenen ofter yet meer nyeus te sien ware, doe spraken si, wi souden noch sien hoe datmen die nagelen vercochte. Also vonden wi dat hi noch eens dierder is dan die noten ende meten ooc metter maten, want dat volc en verstaet hem niet op tgewichte.
Auteursrechtvrij