Die ridderlycke reyse van heer Lodewijck Vertimans van Bolonien

Dat .lxvij. Capit. spreect vanden huysen tot Bider, ende hoe si ghedect sijn, gelijc inden eylande Sumatria.

[fol. 63r]

DJe woninghen ende huysen in dat eylant Samatria die sijn gemuert mer niet seer hooge, ende die meestendeel vanden huysen sijn gedect met scelpen van Tartaruca, dat is een materie wt der zee, dier daer is een groote menichte, ende als ic daer was sach ic een weghen, die woech hondert ende drie pont, ende ick sach twee tanden van oliphanten wegen, die swaer waren .iij^c. ende .xxx. pont. Ende ic sach ooc slangen daer, veel groter dan die ick tot Calcoeten gesien hadde. Nv comen wi weder tot den twee cristenen onsen mede broeders, die geerne weder gekeert hadden naer huys, die vraechden ons wat ons meyninge ware, of wi wouden omkeeren oft dat wi voorder wouden reysen, daer gaf hem mijn medegeselle antwoorde. Aengesien wi gecomen zijn inde contreye daer die specerie wasset, wouden wy geerne voorder ende eens veel vreemde dingen sien eer wi weder keerden, so seyden si ons dat in dese landen geen ander specerie en wascht dan die wi gesien hadden. Doen vraechden wi waer die noten ende die nagelen wassen So seyden si ons hoe dat die noten, folie ende nagelen wassen in een ander eylant bi drie hondert mijlen van daer, so vraechden wi voorder, oft wy ooc voor zeeroouers ende der zee souden vry sijn, So antwoorden si ons, iae, maer daer waren grote fortuynen op die zee, ende met onsen oft dier ghelijcken groote schepen en mochten wi daer niet varen. Doen vraechde mijn geselle, ende wat manieren mochten wi daer comen. Ghi moeste coopen een Chiampana een schip also genoemt, ende dat sijn cleyn scheepkens, dier daer seer vele is. Alsoo baden wi henluyden dat si ons een souden laten brengen. Ende van stonden aen beschicten die twee cristenen datter ons twee ghebracht werden, die goet ende wel gemaect waren, met schipluden ende alle nootdruft daer toe om mede te reysen, die hem verbonden den wech met ons te reysen, Alsoo maecten wi den coop metten Patroon, met alle dinck dat wy daer toe behoefden om vier hondert pardry, welcke van mijn gheselle also van stonden aen betaelt werden, ende daer na spraken wi tot den cristenen O mijn alderliefste vrienden, hoe wel ic niet ben en van uwen geslachte oft geloue, so zijn wy toch alle gebroeders van Adam ende Eua geboren, wilt ghi mi ende mijnen geselle verlaten die in geliken geloue geboren is, geen persiaener, mer te iherusalem is vercocht geweest, als de

[fol. 63v]

Cristenen Jerusalem hoorden noemen, hieuen si die handen op tot den hemel, ende custen daer na driemael die aerde, ende vraechden tot welcker tijt ic tot Jerusalem geweest was ende tot Jerusalem vercocht is geweest, Doen seyde ic henlieden. Jck was ontrent .xv. iaer out gheweest, so sal v wel gedencken vanden lande te spreken. Ja seer wel. Doe sprac mijn geselle. Want ic vele maenden lanc geen groote weelde gehadt en hebbe, ende anders niet van hem begheert en hebbe te ondersoecken ende te vragen vanden saken ende seden des lants, des hi mi al berecht heeft. Ooc sijn sprake, so dat ic can noemen alle leden des menschen, ende alle etende dingen. Als dat de christenen hoorden, seyden si. Onsen wille ende voornemen was wederom te reysen in onses vaders lant, daer wi drie duysent milen af sijn. Maer nv ghi wech reysen wilt ende v geselle doch met v reyst, so willen wi hem rijc maken, oft hi nochtans dat Persiaensche gelooue onderworpen is dat staet tot sinen wille. Daer sprac mijn geselle. Des ben ic seer wel te vreden, ende v geselschap behaget mi seer wel, mer van mijns gesellens wegen dat hy bi v blijuen soude, dat en mach niet gescieden want ic heb hem een mijn goede vriendinne tot eenen wijue gegeuen, om sonderlinge liefde die ic tot hem heb. Mer so ghy des willens sijt met ons geselscap te hebben, so wil ic dat ghi dese gaue van mi nemen wilt, anders en wil ic nemmermeer v goede vrient blijuen. Die Cristenen spraken, si wouden doen dat hem beliefde. Also schonc hi hen een deel robijnen, wel weert sijnde .M. ducaten. Ouer .ij. dagen so waren bereyt die schepen, daer droegen wi in alle onse gereetscap, spijs, dranck, ende ander nootruft, ende namen den wech tegen een eylant ghenoemt Bandan.