Dat .lxvi. Cap. seyt vanden seltsamen handel die daer geschiet inder Jnselen Sumatria.
ALs ic quam in deser stadt daer sach ic vele subtijl ende fraey hantwerc, die ic noyt gesien en hebbe, dat waren doecken van gout gewrocht, ende men cochte eenen om twee ducaten. Jc sach ooc in eender straten bi .ccccc. wisselaers vander munten wegen, want daer coemt een grote menichte van cooplieden, ende daer werdet gebruyct grote hanteringe van veelderley comanschap, so versien si hem daer van alderley gelt, dat daer in die conincrijcken dient. Dit volc slaept op goede bedden van catoen gemaect, ende de doecken meestendeel van siden, Ooc hebben si oueruloedich vele houts, daer wt men die scepen maect gunchi genoemt, dye hebben drie mastboomen, ooc andere scheepkens genoemt Tymoni, want si schepen ouer sommige armen der zee, ende dan comen si op ongehauende plaetsen, in sommige diepten, Sy varen met den winde, ende sperren ooc haer seylen daer na. Als dan een teghen wint coemt slaen si dat seyl om, ende vanghen den wint aen eenen anderen mastboome, ende varen wederom achterwaerts ende dat volck is seer rasch met alsulcken ghereetschap te varen. Het sijn die beste swemmers diemen vinden mach, ende oock om werckelick vier te maken dies ic noyt ghesien en hebbe.
Auteursrechtvrij