Die ridderlycke reyse van heer Lodewijck Vertimans van Bolonien

Dat lxv. Capittel spreect van een ander conditie des pepers, siden, ende ghelijck in dit eylant wascht.

IN dit eylant ende rontsom die stadt daer wascht een grote menichte van peper, dat genoemt wort molaga dat peper is veel grooter dan dat hier gebracht wort, ende veel witter, binnen ist hol, ende niet so scherp als dander is, ende dat wordt bi henlieden vercocht in dier manieren gelijc bi ons dat coren, Den boom die dat lanc peper brenget die heeft veel groter tacken, breeder bladeren, ende veel rustigher op ghewassen dan tot Calcoeten. Jn dese hauene ladet men alle iare .xviij. oft .xx. schepen, die daer reysen aen die plaetse tot Chaten Ende si leggen dat daer eerst begint dye grote couwe. Jn deser stadt maectmen veel siden, ende ooc vele buyten der stadt in de bosschen, dye niet wech gheuoert en wort. Daer is veel siden, maer si en is niet seer goet, men maect daer ooc vele balsems, van sap dat wt sommighe boomen loopt. Dye sommige segghen maer ic en hebs niet gesien dat verre van daer wascht op den lande.