Die ridderlycke reyse van heer Lodewijck Vertimans van Bolonien

Dat .lxiiij. Capittel seyt vande cracht des goeden ligno aloe.

DJe voorgenoemde Christenen gauen mi bescheet ende toonden my die crachte van die eerste, ende tweede conditie van desen houte. Want een van henluyden hadde een weynich houts Calampat ontrent bi twee onsen inde handt, ende hi liet hem dit daer in houden, so langhe als yemant hadde mogen lesen een psalm Miserere mei deus, ende altijt die hant vast ghesloten, Daer na hiet hi hem die hant open doen, terstont ghinck daer een soo grooten ende lieffelijcken rueck af, desgelijcken

[fol. 62v]

ick niet vele geroocken en hebbe, ende het ginc alle ruecken te bouen die wi met ons hebben mogen. Daer na nam hy so vele balsem als een noot groot is. Ende dat selue dat daer wascht tot Sarnau, bi een half pont swaer, welc oock vanden voorgenoemden hout is, ende dat liet hi doen in twee cameren, ende in yeghelic een vier draghen ende den baltsem daer op geworpen, so seg ick inder waerheyt dat dit weynich meer sueticheits ende ruecx maecte dan dat ander des een half pont geweest was. Also hebt ghy verstaen die onderscheydinge, gelijck dat hi bi een gheprobeert, ende voort beste gehouden wert, desgelijcken oock vanden hout aloe Daer wascht oock in desen eylande zeer veel lacken, daer wt men die schoone roode verwen maect, die boomen daert wt coemt sijn gelijc bi ons die nootboomen sijn.