Dat .lxiij. Capittel seyt van driederley conditie des ligno aloe.
HEt is te weten dat vanden gerechten oft besten ligno aloe weynich hier coemt in onsen landen, ende dat is driederley manieren vercocht wort. Dat alder beste noemtmen Calampat, ende dat en wascht niet in dit eylant, dat coemt van eender stadt genoemt Sarnau. Dat selue als ons die Cristenen seyden, dat en leydt niet verre van haren lande, ende dat is dat beste ende edelste, dat ander noemtmen loban, dat coemt van eender vloet. Dat derde heetmen bochor. Ende die Cristenen seyden ons die oorsake waerom dat goet hout Calampat in onse landen niet gheuoert en wordt, is die oorsake. Dat int conincrijck Cathen ende int conincrijck Cini, in Macini ende Sarnau sijn meer groter machtiger coningen dan bi ons Dye hebben veel meer liefden tot desen houte, bisonder totten tween voorgenoemt dan wi lieden, daerom wordet veel dierder van henluyden gecocht, dan vanden cooplieden, diet in heydenisse oft Turckien voeren, ende een pont des goeden ligno Aloe, dat daer geheeten wort Calampat gelt tot Sarnau gheerne x. ducaten.
Auteursrechtvrij