Dat .lxij. Capittel spreect vander groter stadt Sumatria ende van Pider een stadt daer in gheleghen.
IN dit eylant segghen si sijn die beste poorten ende hauenen der zee, van welcken eylande ic geseyt hebbe, dat sy rontom groot is vier dusent mijlen, ende na mijn verstant, als ooc vele andere seyden, so ist dat landt Taprobana, waer in vier gecroonde coninghen woonen, ende haer alder gelooue, seden, ende rechten sijn gelijck tot Tarnasseri. Die inwoonders des lants sijn meer wit dan swert, mer van aengesicht gestelt ghelijc tot Melacha, mer het is cleyn volc van statueren ende leden, ende ghebruycken de maniere van Calcoeten. Haer munte is van goude, van siluer, ende van then, Ende op deen sijde eenen duuel daer op gemunt ende geslagen, ende op dander sijde eenen waghen die ghetrocken wert met eenen Oliphant, Die munte van siluer die gelden die thien eenen gulden, ende die van ten xxv. penningen voor eenen silueren penninck. Jn dit lant is een grote menichte der Oliphanten, dye so groot sijn als ick oyt ghesien hebbe. Dit volck en is niet seer wel geschict, sy verstaen alleen haer comanschap, maer sy sijn goede vrienden den vreemden ende den wtlanders.
Auteursrechtvrij