geheeten Gaza, ende is .xxv. mijlen breet
Teghen die selue vloet ouer leydt een groot eylandt gheheeten Sumerati, ende die inwoonders seggen dat begrijp groot is .iiij.M. mijlen. Bider tijt sal ic breeder mentie daer af maken. Als wy nv inder stadt Melacha quamen, soo wert ons van stonden aen geuraecht ende voor den Soudaen gebracht, die een heyden oft een Machometaen is met alle sinen volcke. Die stadt is geleghen opt lant, ende daer sij in ontrent .xx.M huysen, mer seer slecht, ende hi geeft tribuyt den coninc van Cini, wiens voorvaderen hadden dese stadt laten timmeren binnen .lxxx. iaren, daerom dat een goede hauene ende gelegentheyt der zee is, ende wort gerekent voor den oppersten heere des meyrs oft zees Occeano, ende voorwaer ic ghelooue, dat in die selue hauene, meer schepen landen dan aen eenige plaetsen der werelt, want daer coemt alle gadinghe der specerijen, ende oock alle andere comanschap ende ware Dit landt en is niedt seer vruchtbaer. Het en heeft gheen coren, ende weynich vleeschs, maer hout ende voghelen gelijc tot Calcoeten, aldaer vintmen den sandel met hoopen, ende een berchwerc daer men seer goet then maect. Daer sijn oock vele Oliphanten, vele peerden, buffels, gheyten, luypaerden, ende een groote menichte van pauwen. De handelinghe in deser stadt is met specerije ende met siden. Dat volck is bruyn met langhen swerten hayre, ende hare cleedinghe is seer na die zede ende maniere ghelijcmen tot Alcayro ghecleet gaet, Si hebben breede aengesichten, schietende ooghen, nedergaende nuesen. Ende si sijn van dat geslacht Gianai, een quaet volck, datmen nemmermeer in dese stadt gaen en mach bi nachte, want si smijten ende slaen malcanderen doot als honden. Alle cooplieden die in dese poorte oft hauene comen, ligghen des nachts in haer schepen. Ende die coninck hout eenen stadthouder aldaer, die aldaer recht hout. Ende als dye Coninck met henluyden eenighe saecken tracteren wil, oft hen straffen wil, dan soo segghen si tot den Coninc dat si zijn zeeluyden. Ende ist dat saecke dat hi henluyden dan noch dwingen oft straffen wil,ende datse die coninck nyedt by haer gherechticheydt laten en wil, so draghen de cooplieden ouereen dat si die stadt willen verlaten ende ledich
Auteursrechtvrij