Die ridderlycke reyse van heer Lodewijck Vertimans van Bolonien

Dat .lix. Cap. seyt van der stadt Pego in Jndia.

PEgo die stadt is gelegen ten platten lande, nochtans niet seer verre vander zee gelegen op die slincke hant tegen dat oosten, daer is een seer schoon vlietende water, op den seluen varen veel scepen hier ende ghinder. Des conincx seden ende houdinge des geloofs is gelijc als die coninc Tarnasseri. Haer verwe is een weynich witter, want die locht en is aldaer niet so heet, haer huysen sijn ghelijck dye onse. Dese stadt is ghemuert gelijc onse steden, ende vele goede huysen daer in ende een schoon palleys van steenen ende met calck gemaect. Die conicnk is machtich van volcke te voete ende te peerde, ende houdt altijt voor sinen eygen persoon meer dan duysent Cristenen des lants hier voor ghenoemt, ende gheuet eenen yeghelijck ter maent ses pardey tot haren soude, ende de cost. Jn het lant wascht oueruloedich vele corens ende daer sijn vele beesten, ende ooc alderley vruchten ghelijc tot Calcoeten Men heeft daer weynich oliphanten. Mer van alle andere vogelen ende dieren genoech, ende sonderlinge, de scoonste papegaeyen die ic oyt gesien hebbe, vintmen daer een grote menichte. Ende daer wascht ooc scoon groot hout om schepen af te maken, daer wassen ooc rieten die groot ende dick sijn als eenen bareelken, also dat ic op gheen plaetse grooter ghesien en hebbe, aldaer sijn ooc vele meercatten, dier gheeftmen vier oft vijf om eenen ducaet, Die meeste comanscap in deser stadt is van edele gesteente, ende meestendeel al robijnen welcke daer comen wt eender ander stadt gheheeten Cappellan, van deser stadt gheleghen .xxx. dachreysen, dye ick niet ghesien en heb, alleen dat van sommige cooplieden dat verstaen ende ghehoort. Ende ghy sult oock weten dat die dyamanten ende die groote peerlen in deser stadt also veel ghelden als si bi ons doen, desgelijcken oocdie smaragdus. Als wi nv inder stadt quamen, so was die coninck wel .xv. dachreysen van daer in die oorloghe, met eenen anderen coninck van Ana. Doen wi dat hoorden, doe begosten wi den coninck te soecken, oft wi die coralen so dier conden vercoopen, als wy hoopten, door die informatie der cooplieden, ende voeren van daer met een cleyn scheepken, dat van eenen stuck houts ghemaect was, niet meer dan .xv. oft .xvi. screden lanc ende dye roeren daermen mede roeyde waren rieten, daer wt moecht ghi wel mercken als een riet water schept clieuit van een dan doen si daer aen een bert met coorden ghebonden ende overwonden, in alsulcker manieren dattet veel snelder voort gaet dan een Pergantin Den mast daer in is van een groot riet ende so quamen wi in drie daghen bi een dorp, daer vonden wi sommighe cooplieden die en mochten in der stadt Ana niet comen, om der oorloghen wille. Als wi dat hoorden, quamen wi wederom met henlieden in dye stadt Pego, ende nae .v. daghen quam die coninck in de voorscreuen stadt, welcke coninc een groote victorie vercreghen hadde teghen sine vyanden. Ende den anderen dach daer na leyden ons die Christenen tot den Coninck, om met hem te spreken.