Dat .lviij. Capittel seyt van sommige Christenen coopluden tot Bangella.
WJ vonden oock daer sommighe Cristen cooplieden, ende si seyden dat si waren wt eender stadt ghenoemt Sarnay, ende hadden daer gebracht te vercoopen sijden laken, lignum aloe, ende balsem. Si seyden ooc hoe in haer lant vele vorsten ende rijcke heeren waren, al cristenen, een leefden onder die gehoorsaemheyt des grooten Cans van Chaten, haer cleedinge was van camelot, gheboort ende ghestic met catoen, Opt hooft draghen si bonetten een spanne hooghe, van root laken gemaect, ende si waren witte lieden, ende bekenden haer cristenen te sine, si gheloouen ooc in de heylige drieuuldicheyt, den .xij. apostelen ende den vier euangelisten, ende doopten met water. Sy houden ooc van die gheboorte ende des lijdens Cristi ons heeren. Si houden dye vasten, ende vele heylige auonden ende daghen int iaer. Si scrijuen tegen dye onse op die Armenische zede. Si en draghen gheen schoenen van leyr, maer van siden, ende veel costelijcke gesteenten daer op gemaect, ende si eten op eenen tafel gelijc wy ende niet op der eerden ghelijc die heydenen, ende eten alderley vleesch, si seyden ons ooc hoe dat si wel wisten dat aen de palen des turcx, machtige Christenen coninghen waren, Na vele woorden dye ic met henlieden hadde. Ten lesten toochde mijn mede geselle sijn comanschap onder welcke waren vele snoeren van schoenen ende costelijcke coralen. Als si dye gesien hadden so seyden si, indien wi met henlieden varen wouden in een stadt die si ons segghen souden, so souden si ons wel profijt doen, dat wouden si ons affirmeren .x. dusent ducaten, oft so veel robijnen, die in Turckijen groot gheacht ende wel vercocht souden worden om vijftich duysent ducaten, Doe sprac mijn geselle, hi mocht dat wel doen, ende waer te vreden, in dien dat si wouden wech varen, ende ooc ic, so souden wi mede varen. So seyden si ons ouer twee daghen, het sal een schip na Pego, ende indien dat v belieft met ons te varen, dat moecht ghi doen, soo sullen wi v goet geselscap houden. Als wi dit nv wisten, droegen wi alle dingen tschepe, ende saten daer in met henluyden, ende met sommige andere cooplieden Persianeren. Ende als wi inder stadt vernomen hadden dat die coopluyden goede ende ghetrouwe lieden waren, so hielden wi ons vriendelijc te samen, mer eer wi van daer schieden te weten van Bangelle, vercochte mijn mede geselle al sijn comanschap sonder alleen die coralen, dye en waren niet veyl, ende twee sacken met sofferaen ende .ij. stucken siden lakens van Florenten. Hier mede ist genoech geseyt van deser stadt. Noch eens als ghi vernomen hebt van een groot getal van catoenen doecken ende lijnwaet dat daer gemaect wort. Ende ghy sult weten dat dit garen al gesponnen wort vanden mannen en nyet vanden vrouwen, want die vrouwen en spinnen niet in dese landen. Also schieden wi van daer metten cristenen in een stadt genoemt Pego, die leyt ontrent .M. milen van Bengella. Onder desen wech voeren wi ouer een grote golue des waters
Auteursrechtvrij