Dat .lij. Cap. seyt hoemen die doode lichamen behoudt in deser stadt.
ALle dye coningen ende papen deser stadt Tarnasseri als si gestoruen sijn verbrantmen haer lichamen, ende maken grote offerhande den duuel om der sielen wille, ende behouden de asschen in eerde vaten, alsoo ghemaect al oft glasen waren, ende dat nemen si ende begrauen dat in hare palleysen ofte huysen onder die eerde. Als si den offer doen so doen si die onder sommige boomen gelijcmen tot Calcoeten doet. Si leggen ooc int vier alsmen dat lichaem verbrant so vele welrieckende cruyden. Als lignum aloe, balsem, myrre, ende wierooc, ende vele andere costelijcke dingen, datter de geheele stadt wel af riect. Si bestellen ooc daer toe alle instrumenten ende speelluyden die si crijghen connen, also dat een groot geluyt geeft, ende daer zijn ooc tegenwoordich .xv. oft xx. mannen, gecleyt met seltsame duuuelsce cleederen die maken groote feeste, ende altijt staet daer tegenwoordich sijn wijf, ende gheen vrouwen meer. Alsulcken wesen bedriuen si tot een oft twee vren inder nacht.
Auteursrechtvrij