Die ridderlycke reyse van heer Lodewijck Vertimans van Bolonien

Dat .li. Cap. spreect hoe die coninck zijn wijf voor dat houwelic haren maechdom laet nemen, desgelijcken ooc dye cooplieden, ende edelen.

DJe selue coninc der stat Tarnasseri hout van oudts sulcken ghewoonte. Als dye coninck een maecht tot eenen wijue neemt, so en laet hi geen Bramini oft papen den eersten bi haer slapen ghelijc die coninc tot Calcoeten, maer eenen witten man, oock gheen edelen maer een Christen oft eenen anderen heydenen, dat en faelgeert niedt, dien laet hi den eersten nacht bi haer liggen, opdat hi haer die maechdom nemen soude, desghelijcken doen oock die edelen ende coopluyden sijns rijcx, dye houden al die maniere. Eer si dye bruyt thuys voeren, so soecken si eenen witten man, het si van wat sprake oft gelooue dat hy si dien leyden si inder bruyt huys dat hi bi haer slape, om haren maechdom te nemen, so ghebuerde dat mi ende mijnen geselle. Als wi in de stadt quamen ouer ende niet lange aldaer gheweest en hadden, so quamen ons op een tijt teghen drie edele cooplieden, ende die begonden met mijnen geselle te spreken ende seyden Langalli in pardesi, dat is so vele gheseyt als vrient sidy wtlanders, hi antwoorde. Ja. Daer seyden si. Ethera nali in banno, dat is. Hoe vele dagen sijt ghi hier gheweest oft inder stadt gecomen. Doe spraken wy, het is vier dagen dat wi hier ghecomen sijn in die stadt. Also seide een van desen cooplieden. Biti banno, dat is so vele gheseyt. Coemt met mi in mijn huys, als wi daer quamen, so gaf hi ons een goede collatie ende sprac tot ons. Patancinale bannognam penna peritie in penna periti in penna orangono penna penni cortu, dats. Jc heb een maecht genomen die sal ic binnen .xv. dagen thuys brengen, ende ic begeere dat een van v lieden den eersten nacht bi haer slape. Doe sagen wi deen opten anderen al beschaemt, doen sprac hi.

[fol. 58r]

Turcimamo. Ghi en dorft v niet schamen, want het is alhier die gewoonte in deser stadt. Doen wi dat hoorden sprac mijn geselle, doen wi geen quaet daer aen soo willen wi v wel te wille sijn, nochtans so vreesen wi ons dat ons te quade vergaen soude Dat mercte de coopman dat wi also verdwaelt stonden, ende sprac tot ons. O langalli marancania illeocha menezear irich enu Dat is geseyt O ghi vrient en hebt gheen achterdincken, want in deser stadt ist also ghewoonte. Doen wi nv wisten dat daer also die maniere was, ghelijc ons een wt den gheselscap beuestichde met eenen eede, ende sprack, wi en souden daer daerom niet besorcht sijn. Soo sprack mijn gheselle tot my, hy soude willich sijn desen arbeyt te doene ende te aenueerden. Dies was de coopman blijde ende sprac tot ons Jc wil dat ghi hier in mijn huys ter herberghen blijft so lange dat ick mijn wijf thuis hale. Also hielt hy ons .xv. daghen in sijn huys, ende gaf ons wel te eten ende te drincken, ende dede ons goede chiere. Aen den .xv. dach leyde hi mijnen gheselle tot sijnder bruyt, die sliep by haer den eersten nacht, ende was seer wel te vreden ghelijck hi my daerna seyde. Hy hadde wel mogen lijden dat den seluen nacht een maent lanck geduert hadde want het was een schoon bruyn maechdeken van xvi. iaren, ende die coopman diende ons also vele als hi conde, maer na desen nacht, in dien hi bi haer gheuonden ware, dat soude hem dat leuen gecost hebben. Om alsulcken dienst als hem van mijnen geselle ghebuerde, so presenteerde hy ons, indien wi daer noch vier of vijf maenden blijuen wouden, soo soude hi ons den vrijen cost gheuen.