Die ridderlycke reyse van heer Lodewijck Vertimans van Bolonien

Dat .L. cap. seyt van wilde ende tamme dieren die tot Tarnasseri sijn.

INden lande Tarnasseri sijn vele ossen, coeyen, ende schapen, ende catten die muscus brenghen, leeuwen, hasen seer vele, men heeft daer ooc veel valcken, hauicken, pauwen, witte papegaeyen, ende andere van seuenderley verwen Daer sijn ooc rauen veel grooter dan bi ons die berch ghieren, ende van dat opperste haerder becken, maken si haer wapenen, die sijn gheel ende root seer lustich om sien. Jc sach ooc daer die grootste hinnen ende hanen, die ic oyt ghesien heb, van wonderlike verwe, driemael groter dan onse hinnen. Jn deser stadt hadden wi op een corte tijt te wile wi aldaer lagen veel vreemder dinghen gesien op der straten, wi sagen ooc die hanen met malcanderen vechten vijf vren lanc, so grouwelic dat si opt leste alle beyde daer neder vielen ende storuen. Al sulcken camp gelt by wilen den heeren ende coopluyden .L. oft hondert ducaten, welck den anderen verwint die treckt dat gelt. Die gheyten diemen daer heuet inder stadt, die sijn veel schoonder ende huypscher dan bi ons, ende die genereren seer, dat si hebben alle reysen elcke gheyte drie oft vier ionghen. Men geeft ooc aldaer thien of tweelf goede Castron voor een ducaet. Men heeft ooc Castron van een ander conditie, met hoornen, die sijn veel grooter. Si campen oock met malcanderen. Daer sijn ooc veel buffels, ooc grooter dan in Jtalia. Men heeft daer ooc seer vele vischs, ghelijc bi ons. Ende ick hebbe aldaer gesien eenen graet van een visch die woech .x^c. hondert pont. Die seden ende dat gebruyc der rijcken, die eten alderley vleesch sonder alleen coeyen vleesch ende si eten op der eerden op cleederen, oft tapecerije wt houten schotelen, mer seer schoon. Haren dranc is water ende suycker daer in gesoden, haer bedden sijn goet ende hooge vander eerden ghemaect van catoen, ende die decxsels van siden oft catoen, haer cleedinge is ooc van ghesticte catoen oft siden ghemaket. Die coopluyden ende edelen die gaen een deel in schoon hemden, ende gemeynlijc en hebben si niet aen die voeten, dan alleen die bramini. Haer papen dragen bonetten op haer hoofden van side of camelot, twee spannen hooghe, bouen op dat opperste een dinck ghelijc eenen crans, al met gout omwonden. Si dra-

[fol. 57v]

gen ooc twee nestelen van siden twee vingeren breet, die hangen si aen den hals, ende die ooren behanghen met edele ghesteenten, maer geen aen die handen. Dye verwe van desen volcke is wat witter dan si tot sommighe plaetsen is, wandt die locht is daer coelder dan tot Calcoeten, haer wooningen sijn getimmert na onse maniere, desgelijc ooc die vergaderinge der vruchten.