Dat .xlix. Capittel seyt van Tarnasseri der stadt in Jndia.
TArnasseri de stadt is geleghen nabi der zee op een effen landt wel ommuert, ende heeft een goede hauene van een vloet, tegen dat deel Tramontana, die is teghen der sonnen opganck, De coninc deser stadt is seer machtich aen lantlieden ende goet. Ende hi heeft ghemeynlijc crijch metten coninc van Narsinga, ende met den Bangella ende heeft by C. oliphanten, grooter dan ic oyt gesien hebbe, hi hout ooc altijt bi hondert dusent mannen in sinen dienst te voet ende peerde, haer wapenen tot den strijt sijn cleyn sweerden. Ende hebben seer veel hantbogen ende lancien van riet gemaect, haer cleydinghe is meestendeel van catoen ghemaect ende seer wel ghestict in stede van harnasch. Die huysen in der stadt sijn ghemuert bi na op onse maniere, daer wascht ooc goet coren, goede boomwolle, ende een groot deel siden ende bresiele hout. Oock vele goede vruchten, honich, soete meloenen, concommers, ende vele andere desgelijcken. Daer sijn vele schoone houen van plasantien, daer vele seltsame dinghen in geplant zijn.
Auteursrechtvrij