Die ridderlycke reyse van heer Lodewijck Vertimans van Bolonien

Dat .liij. Cap. seyt hoe hen die vrouwen na den doodt van haren mannen also leuendich verbranden.

DAer is noch een ander maniere ende sede in deser stadt Als een vrouwe weduwe is ende haer man ghestoruen is, van dien daghe aen tot vijfthien dagen, maect dat wijf een grote maeltijt met haren vrienden, ende si roept ooc daer toe haers mans vrienden, ende als die maeltijt ghedaen is, so ghaet si met haren vrienden opt alder colstelijcste, met peerlen ende siden ende edel gesteente aen ghedaen, op die plaetse daer dat doode lichaem haers mans verbrant is, ende dan hebben haer vrienden eenen put in die eerde gegrauen die is ongevaerlijck so hooge als die persoon is

[fol. 58v]

daer om maken si vijf oft ses stocken, ende daer om spannen si eenen siden doeck ende inden put maken si een vier met welrieckende cruden ghelijc den man geschiet is, ende in die maeltijt eet die vrouwe so vele betole, een vrucht also ghenaemt, dat si bi na doof wort int hooft ende daer sijn ooc pijpers ende speelluyden eenen grooten hoop, met sanghe ende grote tirumphe, ende ooc die mannen in duyuelsche cleedinghe, dye dragen vier in haren mont, ende bedrijuen wonderlijcke cluchten, ende maken so een offerhande den duyuel, so gaet dan die vrouwe dye welcke haer verbranden wille op ende neder dansende ende springende metten anderen vrouwen, dier een grote menichte is rontom tvier, ende dicwils keeren si haer omme tegen den duyuelscen mannen, ende beueelt henlieden dat si den duyuel sullen bidden, datse die duyuel ontfermen ende in genaden nemen wil, ende in dien belouen si dan dat si dat ghedaen hebben ende noch doen willen, dat doet dat wijf al met onuersaechder herten, ende ooc met blijscappen, want si en gelooft anders niet, dan dat si also van stonden aen inden hemel gheuoert sal worden. Ende met alsulcken gescrey ende rumoer, soo neemt si dat voorscreuen siden doeck met den handen ende alle haer cleederen ende iuweelen, ende laet haer seluen midden int vier, terstont sijn daer hare naeste vrienden met stocken, ende slaen daermede op haer hooft, ende worpense ooc met steenen, dat si terstont doot soude sijn, ende daer na verbrantmen dat lichaem tot puluer, gelijc haren man gesciet is, Ende die vrouwen die sulcx niet en deden die soudemen houden ende achten gelijc een openbaer vrouwe, ende si worden van haren vrienden doot geslaghen, ende als dat gesciet, so is die coninc van groter eeren wegen altijt tegenwoordich Dat gemeyne volc en doet desgelijcken niet, mer alle die grootste ende beste vander stadt.