Die ridderlycke reyse van heer Lodewijck Vertimans van Bolonien

Dat .xlvi. Capittel seyt van Zaylon van dat eylant daermen vele edele gesteenten vindet.

IN deser inselen oft eylande Zailon daer sijn vier coninghen al edele. Ende ic en can v niet alle dingen berechten wat in desen eylande is, want dye voorgenoemde coninghen oorloghen met malcanderen, dattet sorghelijck ende niet seer goet en was daer lange te blijuen noch niet te ondersoecken, noch te besien ghelijc ic wel had willen doen. Mer binnen weynich dagen die ick aldaer bleef so sach ick daer eenen grooten hoop Oliphanten, die aldaer vallen. So sach ick ooc daer soecken ende vinden den edelen steen robijn, bi eenen grooten berch twee mijlen vander zee gelegen, ende daer onder vintmen die steenen ende robijnen. Ende wanneer een coopman daer coemt om der steenen wil, so moet hi coepen dye eerde metter ellen rontom. Ende als yemant eenen steen vint die int gewichte .x. caraten weget, oft daer ouer, so neemt dat die coninc voor hem. Die andere alle laet hi den coopman volghen. Daer wasschen ooc aen een ander plaetse, naest bi den seluen berge gelegen, ooc bi een groot vlietende water, vele granaten, ooc Saphieren Jachinten ende oock Topasi. Dit lant is seer vruchtbaer, ende daer wasschen oock dye alder beste vruchten diemen vinden mach, Tarrofali veel beter dan met ons, ende soeter Melangoli, ende vele andere vruchten, ghelijc tot Calcoeten, maer veel volcomender ende beter.