Dat .xlv. capittel seyt van Zioromandel een stadt in Jndia gheleghen.
ALso reysden wi op die zee ende landen bi eender stadt genoemt Zioromandel, dat is een zee stadt seuen ghemeyne dachreysen op de zee van Colon tot daertoe te varen, ende dat is een grote stadt ende daer en is geenen muer om ende is onderworpen den coninc van Narsinga, ende leyt tegen den eylandt Zeylon. Alsmen ouer die plaetse van Cumerin coemt. Jn deser vergadertmen een grote menichte rijs Si is ooc eenen sluetel ende passagie van vele lants daerom ooc seer veel heydensche coopluden daer woonen. Aldaer en wasschet ooc gheen specerije, mer vele goede vruchten gelijc tot Calcoeten. Jc vant ooc in dese stadt sommige Cristenen, die seyden mi hoe sint Thomas lichaem niet meer dan .xij. mijlen van daer en lach, ende dat was in bewaringe van sommige Cristenen, si seyden mi ooc hoe dat si inden seluen lande niet meer leuen of bliuen mochten, na dien dye coninck van Portegale daer int lant comen ware, die had veel heydenen doot geslagen, dat ooc die lantluyden voor den Portegaloosers seer verweert ende ooc veriaget waren dat ooc die arme Christenen niet meer daer wonen en mochten, ende tlant woest ende ledich dier tijt lach, ende oock vele al heymelijc ghedoot werden, die selue christenen seyden mi een groot wonderlijc teeken, dat haer vaders die gheloofachtich waren gesien hadden, dat ontrent xx. oft xxv. iaren leden was, dat die Christenen ende heydenen eenen oploop ende eenen slach met malcanderen deden, onder welcke christenen ooc een seer gewont was in sinen arm, die was ghegaen tot sint Thomas graf, ende als hy dat met den verbonden arm geroert hadde, ende van stonden aen was hi ghesont gheworden, Also was ooc den coninc tot Narsinga dat ter ooren ghecomen, Ende van dier tijt aen hadde die coninck tot in sijn doot, ende ooc nv sijn naecomelingen, alle christenen vrientschap ende ghenade bewesen,
Auteursrechtvrij