Die ridderlycke reyse van heer Lodewijck Vertimans van Bolonien

Dat .xlvij. Capittel spreect van den boom daer den caneel af coemt.

DEn edelen boom daer af men die pijpen van den caneele neemt, ghelijct wel den moerbesie boom, dan

[fol. 56v]

dat hi grooter bladeren heeft ende vrucht voortbrengt die witter ende cleynder is dan dien die pijpen oft scorsche van desen boom, die noemen si Darnon. Also dat si altijt ouer drie iaren die schors af doen mer den stam en doen si niet, den seluen boom brengt vele caneels voort. Ende als den caneel eerst gesneden is, dan en heeft si alsulcken cracht niet als ouer een maent. Een heydensce coopman seyde mi dat bouen op desen grooten berch was een hol, daermen alle iaer eens een grote schare des volcx inden lande pelgrimagie oft beuaert ginc, om haer ghebet aldaer te volbrenghen, ende meynden dat Adam daer selue bouen ghewoont hadde, ende daer sijn penitencie volbracht hadde. Men sach ooc noch sijn voeten daer bouen, dye waren twee spannen lanck. Jn dit lant en wascht gheen rijs, mer daer wordes vele van ander plaetsen aldaer ghebracht ende gheuoert. Ende daerom soo sijn dese Coninghen chijnsbaer den coninc Narsinga, daeromme dat hi dat rijs ende neeringe daer laet comen wt sinen lande. Ende daer is een goede locht, niet te heet noch te cout. Ende dat volck is oock swert ende bruyn, ende haer cleedinge is meest van catoen ende siden laken, ende hebben ooc schoenen aen die voeten Dit lant leyt onder de lingie der sterren equinoriael, ende sijn inwoonders en sijn niet seer vriendelike luyden. Si en ghebruycken gheen geschut maer messen ende lancien ghemaect van lange rieten. Dat is haer oorlochs geweer Op eenen auont als wi in onsen schepe ghinghen, daer quam van des conincx dienaren die seyde tot mijnen gheselle, dat hi soude comen met hem tot den coninck, ende soude sijn corael ende soffraen met hem brenghen, dies hi om een goede somme bi hem hadde. Dat hoorde een coopman vanden seluen eylande, die sprac tot mijnen mede gaselle, vrient en gaet niet tot den coninc, want hy sal v die comanscap af coopen na sinen wille Dat dede hi wt sijn eyghen boosheydt om dat hi niet tot den coninc comen en soude, want hi hadde ooc vander seluer comanschap veyl, niet te min mijn geselle antwoorde hoe dat hi ten naesten daghe tot des conincx ghenade comen soude. Ende des morghens namen wy een schip, ende voeren met ghewelt ouer der riuiere van desen eylande aen dat lant.