Kleyn liedtboecxken

[p. 82]

[Welcoom Ionck-man, welcoom Ionck-vrouwe]

Een ander: Op de selve wijse.

VVElcoom Ionck-man, welcoom Ionck-vrouwe,
In't groote gild van de'echte staet,
Men sal u die wetten voor houwen,
Met privilegi, wil en raet,
Godt schiep die Mensch,
Al nae sijn wensch,
Vreedtsaem en kuysch, eerlijck ende mild,
Coomt soo vry in onse groote gild.

Een man, een vrou heeft Godt geschapen,

Al nae sijn beelt in heylicheydt,
Als Adam lach soet'lijck te slapen,
Wt sijn rib is Eva gereydt,
Hy seghend'haer,
Twee tot een paer,
Leeft vreedtsaem, kuysch, eerlijck ende mild,
Wilt ghy wesen in ons groote gild.

Elck moet sijn eyghen roep betrachten,

Ghelijck voor desen is verclaert,
Brenght over malcander gheen clachten,
Waer mede d'een den ander beswaert:
Waert ghy Abra,

[p. 83]

 

Ick was Sara,

 

Leeft vreedtsaem, kuysch, eerlijck, ende mild,

 

Wilt ghy wesen in ons groote gild.

 

In't goede weest selven die beste,

 

In deucht loopt malcander voorby,

 

Maer in het quade sijt die leste,

 

Door liefd' bedeckt gebreecken vry,

 

Elck buych sijn sin,

 

Nae anders min,

 

Leeft vreedtsaem, kuysch eerlijck ende mild,

 

Wilt gy wesen in ons groote gild.

 

Wilt u huys Goddelijck regeeren,

 

V kinderen die u Godt toevoecht,

 

Trecktse op in deucht, met manieren,

 

Soo het Godt alderbest ghenoeght,

 

Tot sijnder eer,

 

Al in sijn leer,

 

Leeft vreedtsaem, kuysch, eerlijck ende mild,

 

Wilt ghy wesen in ons groote gild.

 

Alsulcke lieve echt-ghenooten

 

Nemen wy geern van herten aen,

 

'Tgetal der vroomen te vergrooten,

 

Maer door Godts naem eer mach ontfaen.

 

Hoort om het best,

 

Noch eens in't lest,

[p. 84]

 

Leeft vreedsaem, kuysch lieflijck ende mild,

 

Wilt ghy wesen in onse groote gild.

Na beter.