Kleyn liedtboecxken
(1633)–Pieter Jansz. Twisck–
AuteursrechtvrijNa de wijse: Tis nu by na twee Iaer verstreecken. Of: Leert my Heer u wegen kennen.
IOnckman het is wel haest te trouwen,
Maer te voltrecken dese staet,
| |
[pagina 80]
| |
Dat wil wat langhsaemer aenhouwen,
Daer toe dient u wel goede raet,
Het is wel weer, ghy zijt de Heer,
Maer stelt u lijdtsamelijck hier in,
'Tsal altijdt niet gaen nae uwen Sin.
Ghy moet u vrou lieven, beminnen,
Aenhangen ende niet versmaen,
Met lieffelijcke soete sinnen,
In deucht en vriendtschap wel voorgaen,
Gy zijt het hooft, haer niet verdooft,
Want als het lichaem niet wert gheneert,
Soo wordt die gheheele mensch verteert.
Die vrou is van eenen rib ghenomen,
Nae by het hert, bemint haer seer:
'Tis vleysch van uwen vleysch ghecomen,
Als u lichaem hout se in eer,
Al met ghemack, als een vat swack,
Houtse in weerden, handelt niet hart,
Dat u ghebedt niet behindert wart.
Ionckwijf wy willen t'uwaerts keere,
Sijt ghy ghecomen van die man,
Soo hout hem voor u Hooft en Heere,
Weest een goe hulp, wijkct daer niet van,
Stelt uwen wil, rustich en stil,
Al onder sijn wille ghehoorsaem,
| |
[pagina 81]
| |
Dienstbaer ende deuchdelijck bequaem.
Ghy mooght voortaen nu uwen wille
Niet volghen, als ghy hebt ghedaen,
Ist dat daer coomt eenich verschille
Laet u meyninghe vry eerst gaen,
Soo is die twist, daermee gheslist,
Een cleyne onrust wel diep in wroet:
Wel wijs is hy die het beste doet.
En wilt u lichaem niet vercieren
Met gout of costelijck ghewaet,
Maer met deuchden en goe manieren,
Behaeght u man vroogh ende laet,
Soeckt altijdt vree, daer is Godt mee,
Met eenen sachten en stillen gheest,
Het verciert een vrouwe aldermeest.
Hier mede wenschen wy te samen
Dit lieve soete jonghe paer
Dat sy moghen wandelen t'samen
In lief' in vreed', in deucht eerbaer,
Godt gheef daer by, dat sy en wy,
Met vreughde comen alle ghelijck,
In sijnen heerlijcke Hemelrijck.
Na beter. |
|