Het Brussels moeselken



[pagina 279]
Hoe veel suchten, hoe veel klachten, Eer een Maeght dickwils wilt achten, Hem die haer oprecht bemint, Sy veracht al syn ghebeden, Het is morghe lyck als heden, Tot dat haer de gonst verwint.
[Alder-liefste laet u wreetheyt af] Stemme. Nederlanders geeft u stemme klanck. Alder-liefste laet u wreetheyt af, Het valt my jongh hert soo swaer, Thoont hem liefde, die u liefde gaf, Met dit soete nieuwe jaer, Beloont uwen vrient, Soo hy 't heeft verdient,
[pagina 280]
Die hier voor u deur nu staet, En met hert en sin, Soeckt u weder-min, Ach! beminde gheeft ghenaet, 2. Ey, denckt eens wat ick heb onder-staen, In het suer verlede jaer, Maer ick hoop dat ghy my sult ont-slaen, Want den soeten tydt is daer, Wilt toch metter daet, My thoone ghenaet, Door u vrindelyck ghesicht, Dat ick segghen magh, Ach! beminde, ach! Hoe is myn hert verlicht.
[pagina 281]
3. Ick wensch u een saligh soet nieuw jaer, En aen my daer ick naer tracht, Dat wy 'tsaemen vrolyck met malkaer, Moghen leven, hoort myn klacht, 'kBid' u door dat kint, Dat daer in den wint, Leydt in eenen slechten Stal, Dat ghy myne klacht, Doch niet en veracht, Maer helpt myn on-gheval. Die troost verwerft van die hy mint, Die acht de wanhoop, enckel wint.