Het Brussels moeselken



[pagina 162]
[Sa, sa, laet ons borsten smeren]
Stemme. Sa, sa, laet ons borsten smeren, Lustigh wacker aen den dis, Bier en wyn is ons begeren, Tot dat 'thooft vol vreughden is, Laet potten en ghelaesen, Haestigh vlieghen want ghewis, Wy zyn van Bacchus baesen. 2. Al die spytigh willen proncken, En gheen fluyt neemt in de handt, Dat sy 'thuys gaen ligghen roncken, Want 'tis volck sonder verstant.
[pagina 163]
Die Bacchus niet en eeren, Maer wy heden zyn verpant, Om synen lof te meeren. 3. Lieten wy ons stroet verdorren, Dat ons buyckxken eydel bleef, Hy en sou niet doen als knorren, 'tEn sy men den dorst verdreef, Met Fles oft volle kannen, In den wyn ick vreughdigh leef, By Bacchus vrome mannen. 4. Laet ons leven niet verkorten, Door 'tmistroostigh droevigh zyn, Laet ons toch gheen traenen storten, Als van 'tsap van goeden wyn,
[pagina 164]
't Welck Bacchus ons wilt jonnen, Dat hy elcke Sonne-schyn, Ons schenckt een versche tonne. 5. Op dat wy soo dagh en nachten, In dit goddelycke sop, Onse herssenen versmachten, Dat ons suyssel-bolt den kop, Dat wy dan gheleyden, Bacchus Ton, met hem daer op, En noyt van't nat en scheyden. Heer suyper laet op straet, syn ryckdommen verscheynen, Hy draeght voor syn cieraet, diamanten, en robeynen, En naer dat ick bemerck, 'ten is gheen Iuwelier, Het is syn eyghen werck, ghevrocht door wyn,en bier.