Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

Met wat ceremonien sy haer vyanden dooden ende eten, waer mede sijse doot slaen, ende hoe sy met haer om gaen
Dat XXIX. Capittel

ALs sy haer vianden eerstmaels thuys brenghen, soo slaense die wijfs ende die iongers daer nae schilderen sijse ende behangense met grauwen vederen, scheeren haer die wijnbrauwen af bouen dooghen, dansen om haer heen ende binden hem wel dat hi niet en ontloope, gheuen hem een wijf die hem bewaert ende ooc met hem te doen heeft, ende als die kint draghet dat kint voeden sy op tot dattet groot wort daer nae alst haer inden sin compt, slaen sijt doot ende etent sy gheuen hem wel teeten houden hem so eenen tijt lanck maken ghereetschap, maken veel vaten van

[fol. K6v]

eerdenwerck daer si dranck in doen, backen sonderlinghe vaten daer in doen si die reetschap, daer sy hem mede schyldeeren en palleeren, maken vederen bosschen die sy aen dat hooft doen ende binden, daer mede sy hem doot slaen, maken een langhe snoer Masurana ghenaemt, daer binden sy hem in als hy steruen sal. Als sy alle ghereetschap by malcanderen hebben, soo ordineren sy eenen tyt wanneer hy steruen sal, noyen die wilden van anderen dorpen, dat sy op die tyt derwaerts comen, dan maken si alle vaten vol drancx ende eenen dach oft twee te voren eer die wijfs den dranck maken, voeren sy de gheuanghen eens of twee mael opte plaetse, dansen om hem heenen. Als si nv alle by den anderen syn, die van buyten comen, heet haer die ouerste vander hutten willecomen. Seyt also comt helpt uwen vyant eeten. Des daechs te voren eer sy beghinnen te drincken, binden si den gheuanghenen den snoer Masurana om den hals, dien seluen dach schilderen ende palleren sy dat hout Iwerr Penune genaempt, daer mede sy hem doot slaen willen, diens gesteltenisse is also desefiguere bewist, is langer dan een vayem, strycken dinghen daer aen dat cleeft dan nemen sy eyerschalen die zyn grau, ende zyn van eenen voghel Mackukawa genaemt die stoten zy cleyn als stof, ende dat strycken zy dan aent hout, dan zydt een vrou ende wrijft inden aen cleefden eyerschalen stof, die wy sien geschildert staeghet vol wijfs, om haer die singhen. Als die Iwera Penune, dan is alsoot zijn zoude met haren quispelen ende ander ghereetschap, hanghen zy dan in een ledighe hutte bouen der eerden, in eenen tuynstaeck ende singhen dan daerom alle

[fol. K7r]

den nacht des ghelijckx schilderen ende malen sy den gheuanghen sijn aensicht, oock ter wijlen

dat wijf schildert, terwijlen singhen die ander, Ende als si beghinnen te drincken, soo nemen sy den gheuanghen by haer, die drinckt met haer ende ghecken ende aluen met hem. Als dat drincken nv een eynde heeft, des anderen daechs rusten sy, maken den geuanghen een hutken op dye plaets daer hy steruen sal, daer leyt hy dien nacht in wel verwaert, dan des merghens een ghoede wijl voor den dach gaen sy dansen ende singhen om dat hout daer sy hem mede doot slaen willen tot dat den dach aen coempt, dan trecken sy den gheuanghen wten hutken breken dat hutken af, maken ruymte, dan binden sy hem die mussutana vanden hals af, ende bindense hem omt lijf henen, treckense soo ouerbeyden sijden stijf, hy staet midden daer in ghebonden haerder veel houden dat snoer van beyden syden laten hem soo eenen luttel staen legghen cleyn steenkens bi hem, daer

[fol. K7v]

hy mede nae die wijfs worpt, die om hem loopen, ende crijghen teeten die selue sijn daer gheordineert ende gheschildert, als hy ontween ghesneden wort metten eersten vier stucken rondtom die hutten te loopen, daer nae hebben die andere tijt verdrijf, Als dat nv geschiet is, maken sy een vier ontrent twee screden wijt vander slauen dat vier moet hy sien daer naer compt een vrou metten hout Iwera Pemme geloopen, keert die vetbusselen om hooghe, tiert ende ghebeert van vreuchden, loopt voor den gheuanghen ouer op dat hyt sien soude, Als dat gheschiet is soo neempt een mans persoon dat hout gaet daer mede voor den geuanghen staen, houdent voor hem, op dat hijt aensiet, ter wijlen gaet die de welcke hem doot slaen wil selue henen met noch xiiij. oft. xv maken haer lijf grau met assen dan coempt hy met sijne mede ghesellen opte plaetse by den gheuanghen, dan leuert die ander die voor den gheuanghen staet dat hout ouer, soo coempt dan die Coninck van der hutten ende neemt dat hout, ende steket den genen die den geuangen doot slaen sal eens tusschen die benen door, dwelck nv een eer onder haer is, dan neemt die wederom dat hout die doot slaen sal, ende seyt dan: Ia hier ben ick, Ick wil v dooden, want die uwe hebben mijnder vrienden oock veel gedoot, ende geeten, dat antwoort hy, als ick doot ben soo heb ick noch veel vrienden, die sullen my wel wreecken, Daer mede slaet hy achter opt hooft, dat hem die Herssenen daer wt springhen, terstont nemen hem die wijfs trecken hem opt vier, schrabben hem die huyt al af, maken hem ghans wit, stoppen hem dat achterste met een houtken toe op dat hem niet en ontgae,

[fol. K4r]

als hem dan die huyt af gheueecht is, soo neemt hem een mans persoon, snijt hem die beenen ouer die knyen af, ende die armen aen dat lijf, dan comen daer vier wijfs ende nemen die vier stucken ende loopen daer mede om die hutten heenen, maken een groot geschrey ofte gherucht van vreuchden, daer nae snijden sy hem den rugge metten achtersten vanden voordelen af, dat selue deylen sy onder haer, maer dat ingewant behouden die wijfs siedent, ende int sop maken sy een brye, mingauw ghenaemt, dien drincken sy, ende die Kinder dat inghewant eten sy, eeten oock dat vleesch vanden hoofde, die herssenen binnen in dat hooft, die tonghe, ende wat sy sus daer aen ghenieten connen,

dat eeten die iongers, als dat al geschiet is, so gaet dan een yegelijck wederom na huys ende nemen haer deel met hen, die gene die desen gedoot heeft gheeft hem seluen noch eenen naem. Ende die Coninck vander hutten schrabt hem met eenen tant van eenen wilden dier bouen aenden arm,

[fol. K4v]

alst recht gheheelt is, soo sietmen dat lictecken, dat is een eere daer voor v, dan moet hy den seluen dach stille ligghen in eenen nest, doen hem een cleyn slits boechken met eenen pyl, daer hy den tijt mede verdrijft, schiet daer mede in was, dat gheschiet daerom dat hem den arm niedt onseker oft onghewisch worden en soude vanden verschricken des dootslaens. Dat al heb ick ghesien ende ben daer by gheweest, sy en connen met ghesetten ghetal niedt voerder tellen dan vijf toe, als si voordertellen willen wysent syt beyden vingheren ende teenen der voeten, als sy willen van grooter ghetal spreken, wysen sy op vier oft vijf persoonen soo veel vingeren ende teenen als die hebben.