Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe veel wyfs een heeft ende hoe hy hem met haer hout.
Dat .XIX. Capittel.

DEn meesten hoopen heeft maer een wijff elcks, sommige ooc meer, maer sommige van haer Coningen hebben xiij. ofte xiiij. wijfs. Die Coninc die ick lestmael geschoncken was, vanden welcken my die Francoysen cochten, Abbati Bossange genaemt, die hadt veel wijfs, ende eene die syn eerst geweest was, die

[fol. K1v]

was die ouerste onder hem, elcken vrouwe hadde haer logement inden hutten, eygenvier haer eygen Wortel ghewas, met welcke hi te doen hadde inder seluen losoment was hi die ghaf hem te eten, dat ginc so om die kinderen die si hebben trecken op weydewerc als sy groot sijn, ende wat sy brenghen gheeft een yeghelijck sijnder moeder, die coocken dan ende deylen dan den anderen mede, ende die wijfs verdragen haer wel onder malcanderen. Sy hebben ooc die maniere dat deen anderen een wijf schencke als hijse moeyende is, oock schenckt den eenen den anderen een dochter oft suster.